Weitblick über die Weststeiermark - vom Krautwasch zum Gleinalpenschutzhaus

Der Nebel is untn, sieht ma jo... oder eben ah ned... wenn ma selber untn im Tal irgendwo is, weil da isses fast überall trüb... Drum hab i ma am Samstag denkt, schau ma mal, wie es oberhalb des Nebels ausschaut... Und da hab i mi fast nimmer einkriegt vor lauter STAUNEN!!!

DEN Weitblick und DIE herbstlichen Stimmungen derzeit erlebt ma nur, wenn ma irgendwo über der Nebelgrenz sein kann. Dazu a poar letzte Schwammerln, a poar letzte Bleamal und auch den erstn Schnee auf der Höh, der - das Datum meints ja sowieso schon - a bissl winterliche oder vorweihnachtliche Stimmung aufkommen lasst.

A klane Orientierungshilfe: Von Voitsberg über Stallhofen nach Geistthal und dort rauf bis zum ehemaligen Gasthof Krautwasch (mitm Auto alles zsammen a knappe halbe Stund). Da is ma scho über 1100m Seehöhe, lasst den Nebl untn und tankt Sonne. Dann gehts gemütlich und mit toller Sicht leicht bergan auf gut markierten Wegen. I hab durchs Fotografiern a bissl vüü Zeit vertrödlt, drum bin i doch nimmer aufm Gleinalmspeik raufgangen und hab beim Gleinalpenschutzhaus auf 1586m umdraaht, weils schon drei Uhr war.

Sonst wär des ah no a schönes Ziel gewesn. Runter dafür bin i umso schneller, weils um fünfe finster wird. Grad no bis zum Auto gschafft und in neuer Rekordzeit zruck mit jeder Menge Bilder und viiiieeel in mir gespeicherter Sonnenenergie für die kommende Wochn ...