Advent, Advent
Advent, Advent
de Zeit varrennt.
Stille Zeit?
I hob ka Zeit!
Wohin muaß i noch laafn,
wos hob i noch zan Kaafn?
Mia schenk´ ma uns jo heia nix.
Des is schon amol sicha fix.
Vielleicht a Packl, gonz a klans?
Von dir kriag´i doch sicha ans.
Rennen, hetzen, Weihnochtsbam?
Ach, der is jo längst daham.
Und i muaß noch Kekslan backen.
Sonst is gor nix mit Frohlocken.
Linzer Augen, Stollen, Kuchen.
G´scheita war, an Urlaub buchen.
Basteln, Singen, Dekorieren.
Kerzenschimmer. Jubilieren.
Gonz viel Post und Bettelbriaf.
Greif´i ins Börsl? Und wia tiaf?
Spendn fia de ormen Kinder.
A neies Handy von dem Inder?
Des olte is eh schon von gestern,
tuan olle lei schon d´riba lästern.
Do konn i glei - originell
an Heiligobnd auf da Stell -
Fotos von uns - in stiller Nocht
im feinen Zwirn, a jeda locht -
an olle Meglichen vaschickn
und Hinz & Kunz damit beglückn!
Des Jesuskindl, des hätt g´lacht,
hätt´ man in jener Heilignacht
mit Kuah + Esel Fotos g´macht!
Oh du sel´ge Weihnachtszeit!
Gier und Hektik weit und breit.
Besinnlichkeit, große Gedonkn
an Kriag und Flucht und an die Kronkn?
Do fehlt die Zeit, des bleibt a Wunsch.
Liaba trink´ ma noch an Punsch.
De Sorgen olle weg getrunken,
wia tiaf samma denn schon gesunken?
Jedes Joahr de selbe Leier,
i muaß noch auf a Weihnochtsfeier.
Wichteln is dort Tradition.
Wos es da gibt, des hob i schon.
Doch mocht nix, i konn ´s weita schenken.
Wem, muaß i nur aus mir denkn.
Advent, Advent.
Der Huat mir brennt!
Wos werd´ i Feines uns wohl kochn?
Bleibt fia ´n Friseur noch Zeit? 1 Wochn.
Im Supamorkt a Mordsgedränge
leise dudeln Weihnochtsklänge.
Einkaufswogn voll bis oben.
Mia miaß ma anfoch Olles hobn.
KassierInnen, Verkäuferinnen
fia de gibt ´s leida ka Entrinnen.
Sie brauchn dringend noch der Plog´
a poar ruhige Feiertog!
I sing laut "Christ ist erschienen",
do follt mir ein: "Ach, die Pralinen!"
Schon tua i Kugeln rolln und tunken,
dressier´n, glasier´n - i hob kann Funkn -
wia sollt´ i des noch olles schoffn?
I geh´holt heit´ amol nix Schlofn.
Irgendwie is oll´s zan Packn.
Leise hear i schon de Glockn,
de siaßa nie klingen ols in Heil´ga Nocht.
Zum Essen, gonz anfoch hob i
Wiaschtlan lei g´mocht.
Vor´m Singen trink´ i noch a Glasale Wein.
Und schlof donn bei "Stille Nacht" ganz stille ein!
I traam davon, dass ´s draußen schneit:
Oh du schöne Weihnachtszeit!
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.