Brotbåcha
"Friah håd ma an Zeitdruck ghåbt"
Brotbåcha woa voa Joahn ned nua körperlich recht ånstrengend, es hod ah schnö geh miasn.
URFAHR-UMGEBUNG (vom). Frischs Brot schmeckt ned nua guat, des Båcha håd ah a långe Tradition. Im Zeitoita vo Brotbåckmaschinen erinnat ma se gern amoi zruck, wo nu mit da Haund knet wordn is.
Es woa a reine Gfühssåch
Ana der nu woas, wias friah båcha hom, is da Warschenhofer Wolfgang aus Goineikira. Nebn sein Hof steht a oids Båckheisl. Da Ofn drin derfat so um de 200 Joah oid sei. Das des Heisl runduma baut håm, is nu ned so laung her. Es håd daun hauptsächlich ois Schutz vorm Regn dient. Da oide Ofn is aus Lehm, håd a rundliche Deckn und nur vorn a Lucka, wos Brot einigschobm worn is. "Eighoazt håms zwa bis drei Stund vorm Båcha. Dazua håd ma ungefähr 30 Metascheida einigstapöt", was da Wolfgang. Ob de Hitz passt håd, woa a weng a Gfühssåch. Thermometer håds jo dåmois ned gebn. Wånns daun so weit woa, is des Restfeia aufteilt worn in an Ring. "Mit Reisat håm meine Voafoan daun nu de Gluatrestln aussagwischt. Des woa a Qualitätsmerkmoi, wei wånn ma des vergessn håd, hätt sese ins Brot eibrennt", sogt da Goineikirchna. Den Sauertoag fias Brot håms dawei in da Stubn in an großn Wandl knet. Ba dea riesign Menge woa des a gaunz sche schware Oawat. Es is nämli ned so oft båcha worn, nua zirka oa moi im Monat – dafia owa glei 30 Loab. "Woa ois fertig, san de Bäcka unta Zeitdruck gstaundn. Is des Ofntial amoi offn gwesn, håds nämli schnö geh miasn, wei sunst z'vü Hitz valorn gaunga wad. Nochlegn is jo ned gaunga", was da Wolfgang nu. De Toagling san daun in Ofn einigschobm worn, wos ah a Kunst fia sich woa. Da Plotz håd ausgnutzt wern miasn, owa wånns z'weit banaund woan, sans zaumpickt. "Oa moi glegn, håd mas daun ah nimma vaschiabn kina." Is des Brotbåcha bsundas glunga, håm de Bäcka den restlichn Tog frei griagt. Do merkt ma hoid, wos a guats Brot dåmois nu wert woa.
Heitec erleichtat s'Lebn
Heid is da Ofn am Warschenhofergut nua mehr gaunz sötn in Betrieb. Owa funktioniern dat a ah nu noch so launga Zeit einwondfrei. "Den Aufwond duat ma se oafoch nimma au", sogt d'Haider Johanna aus Engawitzdöaf. Sie is Direktvamoaktarin und vabåcht jede Wochn zwischen 30 und 40 Kilo Möh. Dazua hods große Brotbåckmaschinen und an moderna Ofn. "De Heitec-Geräte heidzutogs hom zoireiche Funktionen. So a Krustn wia in an oidn Ofn griagst owa trotzdem ned zaum", sogt d'Bezirksbeirin.
Kinda woan im Ofn
Friah san de Brotloab nochn Båcktog in Leinentiacha glogat worn – ma håd jo daun a Monat auskema miasn damit. Heid griagst jedn Tåg frischs Brot in gressta Vüfoit zkafn. Schau alloa d'Johanna biet nei vaschiedene Sortn au – vom Bauernbrot, über Nuss- und Zwüföbrot – natirli ois Bio. Dafia hods ah schau vaschiedene Auszeichnungen griagt. De Nochfrog noch den traditionön Sauertoagbrot wochst laut da Engawitzdöafarin owa wieder. Und des Intressante drån: De Rezepte san seit eh und je unverändert. D'Johanna woas vo Erzählungen vo ihra Muatta nu, das in de oidn Öfn de Kinda einigroin und aussaputzn miasn håm – natirli erst wånn da Ofn ausküht woa. Ah wånn ma heid wieda vü so mocha wü wia friah – des wirds woi nimma gebn.
Söwa Brotbåcha
• Wånnst söwa Brotbåcha wüst ba dir daham, brauchst ned vü dazua. D'Haider Johanna sogt an Kochlöffö, a Wååg, a Form und an Weidling. Damit moants a große Riaschissl aus Metoi mit zwa Höngön drau. Es passt owa ah a oafoche Germtoagschissl, wia ses zum Beispü vo Tupper gibt. Und natirli an Ofn wost båcha kaunnst. "Des muas owa ka Heitec-Geträt sa", sogt d'Johanna.
• Host dei Zeig banaund und bist da owa unsicha, wiast as am bestn augehst oda wöchan Toag dasd mocha soist, is am gscheidan, du gehst vorhea nu zu an Brotbåchkurs. D'Seminarbeirinna ausn Bezirk bietn soiche immer wieda aun. Wånn de Kurse ausgschriem san, muas ma owa schnö sei, wei de san meistns glei ausbucht. Aussadem wern ah auf da Låndwirtschåftskåmma Seminare aunbotn. De Termine dazua findst im Intanet unta ooe.lko.at.
Mehr intressante G'schichtln zu Hoamat & Brauchtum in Urfahr-Umgebung
"Deshoib gibt's so vü Leitnas"
"Då füh i mi oafoch daham"
Hoamat in sich söbst findn
A Bünkö, wia na d'Oma scho gmocht håd
Oft geh's ban sportln um d'Gemeinschåft
"Ois aundare ois a lästige Pflicht"
Krapfal und ea launge Tradition
Hoamatg'schicht nåh dalebn
Blaudruck ståmmt eigentli aus Indien
Schengaföna Geheimnis glüft?
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.