A Gedicht hoid/68
Prosit Neijohr
An guadn Rutsch sogt ma vor Süvesta und daun Prosit Neijohr -
vü wern sicha a schau froh sei, das vabei is - s'oidi Johr,
des Virus nervt hoid schau gewoitig und des wiad a nu a Randl so bleim -
maunchmoi is weiniga schlimm, owa maunchmoi is a zan speim,
vielleicht warads guad mitanaund des Besti draus zan mocha -
bled is hoid, wau ma ois nua schworz sicht und vagisst zan locha,
guadi Vorsätz fias neichi Johr gibts jo öwei wieda a -
nua de Umsetzung is oft a Probleim und oft gaunz schei schwa,
s'rauka aufhern, oneima, san a poar Sochan wos ma si vorneima duad -
de guadn Vorsätz, san owa meistns a gaunz schnö wieda fuad,
af da Bettbaunk sitzn vorm Fernseher, i glaub das des a Jeda keinnt -
do foits oft gaunz schei schwa zan aufsteih, das ma a Runde reinnt,
do güts in Schweinehund übawindn, in d'Heh in Oasch und a Runde gei -
hod ma des daun gschofft, kimmt ma drauf, des is eh gaunz schei,
in diesem Sinn - nu amoi Prosit Neijohr und bleibts gsund -
deinkts positiv, daun gibts zan Triabsoi blosn, iwahaupt koan Grund!
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.