A Gedicht hoid/71
Wieda a bissl mehr locha......
Zeit wiads das si schei laungsaum wieda Ois a weingl normalisiert -
weng dera deppadn Pandemie, is leida eh schau vü zvü passiert,
vü schiachi Sochan, maunchi haum si zastridn und worn amoi guadi Freind -
schaun si nimma au und doan so wia waun da oani dein aundan nimma keinnt,
vü Augstödi in de Gschäftln haum des a kriagt gaunz schei zan g'spian -
de kinnan owa nix dafia, de haum hoid oafoch messn kontrolliern,
de Politik mocht des Vurschriftn und beschliaßt a neichs Gesetz hoid a -
an Jedn recht mocha geht sowieso nia, na des is gaunz schwa,
mia oilli mitanaunda derfan uns lossn ned ausanaunda dividiern -
a bissl mehr Rücksicht und Respekt und a efta eischoitn des Hirn,
mehr Gaudi haum und mehr mitanaunda locha warad bessa und a gsund -
ned aufhussn lossn va aundari, na, dazua gibts gor koan Grund,
es gibt jo nu gaunz vü schlimmari Sochan af dera Wöd -
wei leida gehts hoid oft ums eigani Ego und und um imma mehr Göd,
grod jetzt duad eh so a Größnwauhnsinniga wieda zündln und gibt koa Rua -
i glaub, Kriag, Not und Ölleind, hods eh schau gem gnua!
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.