Simmering in den 50er Jahren

Alter Topf findet Deckel

De gaunze Gschicht spüt se ende da fuffzga Johr oh, wo es Leben net so hektisch wor…Da Herr Leopold is ah Mau so um de sechzig, hot no fü
Hoor fia sei Oita, grau sans hoit scho… Ca ansfünfasiebzig is er groß,
ochtzig Kilo schwa….. Er schaut no gaunz guat aus, oba, Er losst
Si ah bissl geh. Net das Er dreckig is, oda miffet, na des net. Oba Er trogt imma des söbe Gwaund, des gleiche Sackl. De Hemdn san ausgwoschn, de Seckln gstopft, de Hosn hot ah scho bessare Zeitn gsehgn, de Schuach ohghatscht. An Huat hot Er ah, der schon den Kriag gsehgn hot, weu der schaut aus, ois hät er den Deckl von sein Großvata gerbt. Im Winta hot Er an Mauntl au, an schworzn Übazieher, aus an guatn Gradl, oba oitmodisch. Und ziemlich ohtrogn is ah da Mauntl. Da Herr Leopold wohnt in Simmaring im öften Hieb, im Högahof, in ana Klanan Gemeindewohnung. Er und sei Frau haum in an Haus gwohnt des wos im Kriag zabomt wurn is. Eigentlich haums ah Glick ghobt das glei ah Gemeindewohnung kriagt haum, obwoih aun da Fassad vom Högahof no de Eischußlöcha von de dreissga Johr drin san.
In da oitn Wohnung, wos nua Zimma Kuchl ghobt haum, woa hoit ollas vatraut, do is ah aufgwochsn, hot gheirat. Ois in de neiche Wohnung zogn san, is glei drauf sei Frau gsturm. Glicklich is ah net gaunz in da neichn Wohnung.
De Wänd san dünn,aum Heisl heart ma waunn obn oda untn ana pfortzt.
Oba Ans is guat, ah Bod hot da Einzelraum, sogor ah Vurzimma und ah Kocheckn und ah Klo des wos net aum Gaung is. Sei Weibal hot eam ollas beibrocht, Kochn, Woschn, wos hoit ollas dazuaghert. So gsehgn kaunn ah de Wohnung in Schuss hoitn… Is Fruahstuck besteht aus Tee, Buttabrot,.. aum Sunntog leist da si an Striezl und an Kaukau, der liegt eam zwor im Mogn, oba Er mant des ghert zum Sunntog wie da Heinz Konrads mit der Sendung „Was gibt es neues“…. Zum Nochtmoi isst Er gern zum Beispü ah Dürre… und waunn Saison is an Radi dazua. Oda ah Gsöchts mit an Fettrandal,. Es haum erm scho etliche Fraun schene Augn gmocht,Er hot hoit de Aungst ghobt das wieda schief geht.
Ois wieda amoi so weit is zum Wäschwoschn, is Er in de Woschkuchl gaunga, , weu Er glaubt hot, Er hot heite Woschtog. Daweu is scho wer drin. Do hot Er an Grant kriagt und se aufgregt. De Frau de grod de Wesch in de Woschmaschin einegebn hot..ah resche Frau, guat gstöt und fesch….. De Frau wor gaunz baff..
ois da Herr Leopold si augaunga is wia ah wachs Labal… „Herr Leopold“ hot se gsogt „Bevur se eana an Herzkaspal hoin, schauns liaba aufn Woschplan, haums vielleicht narrische Schwammaln gessn?... Oda is ihna ah Laus mit Tschernkn übat Leba grennt?... Tans den Kopf schief hoitn, lossns des Hirn zaumrinna,
vielleicht haums daunn an liachtn Moment… Sowos narrisches, najo vielleicht haums eanare Spekuliereisn scho zlaung… und jetzt ausse aus da Woschkuchl, aunsunnstn wir I zum Dariwudl.“… Da Herr Leopold wor gaunz vadattert, weu sowos von ana narrischn Funsn von ana Frau… is eam no net üban Weg grennt. Er hot sei Weschkerbe gnumma, is in sei Wohnung zruck. Des hot eam gaunz sche hergnumma… Anerseits hot Er si üba sei eigene Bledheit gärgat,… Aundraseits wia kummt des blede Weib dazua, eam so obezmochn. Wos büd sa se ei de narrische Gurkn… Inzwischn hot Er si wieda ogregt,…… Sie kummt eam imma wieda in seine Gedaunkn vur. Eigentlich fesch, de Hoor
meingott na, so schene Wuckaln,. an rundn Hintan,.
solide Gspasslabaln, Guckaln de blitzblau san,.. mit an Wurt, sei Tram schlechthin. De gaunze Nocht hots eam ka Ruah lossn, hot se no gärgat weu eam de Frau net Schlofn hot lossn,… so is umgeistat in sein Hirn.
Aum nächstn Tog hot Er nochn Fruahstuck si z´saumgrissn, is aufn Morkt zum Blumenstandl. Hot an Buschn Nelken kauft, mit an schen Papierl drau, is ham, hot se ah frisch Hemat auzogn, des Sackl ausbirscht, se rasiert, mit Odol de Pappn ausgschwabt, wü auffe zu Ihra Wohnung. Hm wia hasst des Puppal denn? Do wer I den Hausmasta frogn. Wieda obe, ausse zur dreier Stiagn, wo da Hausmasta sei Wohnung hot. Leit au beim Hausmasta, der mocht auf,
„ Griaß ihna Herr Franz (so haßt da Gebieta üba fünf Stiagn) kenntatn se mir sogn wia de fesche Frau hast auf meina Stiagn?“ „ jo wöchane denn?“ sogt da Herr Franz „ I man de mit de fün Wuckaln und Kukascheckn im Gsicht, se hot gwusst das I Leopold Hass, des stiert mi scho und I Depp was net wia se hast, Teife no amoi“ „ Do kenntaten se nur de Frau Maria mana, de schaut ungefähr so aus, jo de is fesch“ sogt Franz „ Nau wos fia ah Tianumma hots denn?“ „ Nau guat“ grinst da Hausmasta „des kost Ihna oba ah Bier beim Wirtn ausgmocht?“
„ Waunns kloppt zwa Bier und ah Beischl, oba jetzta spaunnans min et auf de Foita, sogns ma scho de Tianumma“ „Oiso se hot de Numma…6 “ Daunk sche Herr Fraunz, hoitns ma de Dam, pfiat Ihna“ Ausse aus der dreier Stiagn, eine in sei fünfa Stiagn. In sei Wohnung, de Bleamaln hoin, no amoi Kampen, Schneizn. Ausse, auffe in Stock und..nau wos is, traust di net Auleitn? Denkt da si… Endlich hot Er gaunz fest auf de Klingl druckt… Drin hots gleit, ma hert wia wer zua Tia kummt und de Frau aufmocht. Weu Er den Bleamalstrauß vua sei Gsicht ghoitn hot, hot si net glei gsehgn wer do hinta de Bleamaln steht „ Jo wos woinns?“
„ Äh I wollt mi entschuldigen fia mei Benehma, unlängst in da Woschkuchl“ „ „Aha se san der Herr Leopold“ und sie hot grinst übas gaunze Gsicht. Da Leopold gaunz valegn, kriagt an rotn Plutza und sogt „ Jo I bins, tät mi gfrein waunns wieda guat san mit mir und… bevurs wos sogn, mecht I frogn ob se vielleicht…“ „Jo wos denn?“ hot Frau Maria gsogt „ I mecht, I woit, naujo, wos tätns dazua sogn waunn I Ihna ins Theater eilodna tät?“ Er hot gstottat wia ah klana Bua „ Gern Herr Leopold, oba jetzt kummans eine auf an Kaffee“
Und so san de zwa laungsaum oba sicha näha kumma. Jetzta sans nimma so allane und es hot se ah klans Glick aufbaut. Se soin no etliche Johr weida glebt haum und hoibwegs glicklich den gemeinsauman Weg gaunga sei.

Diese Geschichte ist in meinem Buch (im Eigenverlag herausgegeben)
Wienerisch ernst und anders