Dialekt

Mundoart hot mit gscheat redn nix z'toa

"Mundoart is net nur Brauchtum, sie is Lebensinhoit. Des gibts übaroi auf da Wöd. De Sproch, de ma ois Erstes im Lebm red, soi ma pflegn", sogt da Pachleitner Berndt vom Stelzhamerbund Perg.

BEZIRK PERG. Untaschiede gibts bei unsare Dialekte vü. Und des ned nur in Oberösterreich und zwischn den Viertln und Bezirke, sundan teilweis scho va Ort zu Ort. Grundsätzlich kau ma sogn: Je weida weg vun da Stodt, umso mehr bleibt da Dialekt erhoidn. „Dort hod zum Tei jede Gemeinde aundre Sübn und Wöada“, woaß da Pachleitner Berndt, da Bezirksobmau vom Stelzhamerbund. Des is a Varein, der si gaunz dem Erhoit da Mundoart vaschriebm hot. Warum eigentli? Ma kunnt jo moana, dass des eh gnua is, waun ma togei, togaus so redn, wia uns da Schnobi gwoxn is. Mundoart und Umgaungssproch san oba zwoa vaschiedene Poa Schuach.

Z'fleiß schlaumpad redn

"In de Städte is de hoate Mundoart vawoschn", sogt da Pachleitner. D'Umgaungssproch is zum Beispü in Linz oafoch a ogschwächte Variante vo da Hochsproch. De Mundoart, um de si da Stelzhamerbund so bsundas umschaut, is mit da Zeit gwoxn. "Da Ursprung is nix Aufgschriebms gwen. D'Mundoart is entstaundn, wia si de Leit mitanaund untahoin hom." Desweng kau ma ah ned kraumpfhoft jeds Wort aus da Hochsproch iangdwie aufn Dialekt hibiang. Maunche Leit woin gaunz bewusst schlaumpat oda schiach redn. Aundare redn liaba Hochdeitsch, weil sa si füan Dialekt schauman. Oba: "Gscheat redn hot mitn Erhoit der Mundoart nix zum doa", is si da Pachleitner sicha. Mundoart haßt ned, dass ma im Wirtshaus aufn Tisch haut. Oda dass ma am Fuaßboiplotz de grauslichstn Kroftausdrücke schreit.

Zwoasprochig in da Schui

Da Stelzhamerbund schofft oba neamd au, wia a zum redn hod. Und maunchmoi bringan sogoa de Jungan neiche Sätz und Wöata zaum, de oafoch hihaun im Dialekt. Zum Beispü: "Des zaht mi ned". Do kennt ma si sogoa aus, waun ma des nu nie gheat hod. Redn dama in Dialekt jedn Tog gauns söbstvaständli. Schreibn is do scho gaunz wos aundas. Im Stelzhamerbund warats jo am liaban, waun ma de gschribne Mundoart zu da Schriftsproch dazua in da Voiksschui leana darat. Und deshoib gengans ah in die Schuin und probiern des Schreibn mit de Kinda aus. Ned nur a SMS, sundan vielleicht sogoa an gaunzn Aufsotz. Des is nämli goa ned so leicht, dass si des ah noch wos auheat. De Mundoart-Autoren wia da Riegler Gregor aus Mauthausen lernan de Leit, wia ma schreibt und vortrogt, ohne dass hoipat und stoipat. Waun des ana kau, daun kumt richtig außa, wie vü Facettn unsa Dialekt hod. "Do biang si de Tisch, waun der zum Redn aufaungt", dazöht da Pachleitner zum Beispü üban Hackl Koarl aus Bod Zö.

"Dialekt is Identität. Da Jesus hot am Ölberg sicha ah ned Hochsproch mit seine Jünga gret", sogt da Pachleitner Berndt.

Gaunz vü, wos uns bewegt, kaun ma nämlich in da Hochsproch goa ned sogn. Wei da Dialekt zur Identität dazuagheat. "De Foabnprocht beim Ausdruck is erhoitnswert", findt da Pachleitner. "Uns is wichtig, dass de Leit vastengan, dass Mundoart ned oidfaderisch is. Mundoart kau lustig und ernst sei und zum Nochdenga auregn. Mog sei, dass amoi a Generation gibt, der da Dialekt nimma ogeht. Oba mir föhlata scho gewoitig."

Vaaunstoitungen

Am 19. Mai lonan da Stelzhamerbund und de Goidhaubm zu ana bsundan Mess: De Luftnberga Goidhaubm feian nämli eana 40-jährigs Jubiläum. Zu dem Aunloss gibts a Bezirks-Maiaundocht um vieri Nomittog in da Kirchn in St. Geoang aun da Gusn. Des Bsundare drau: Olle Texte ba da Aundocht wean im Mühviertla Dialekt voatrong. Nochher bittn de Fraun zur Agapm ins Pfoarheim.

Am 30. August lesn da Gumpenberger Fraunz und da Lasinger Engelbert im Forum Luftnberg. Dazua spün de Hoizbläsa "Quintessenz".

Am 16. Oktoba lonan da Stelzhamerbund und da Wirtschoftsbund beim Gmeiner Leo in Weinzierl ei. De Autorn Eveline Mateju und da ortsbekaunte Hans Dieter Mairinger trogn dort vor. Ah dabei: Da Mitterlehner Benno mit seina Quetschn.