Da "Buda Kogla"

Da Ongara Michl wor a recht a g`rührigs Mandl. Er hot fleiße g`orbat, hot a liabs Weibal und etla brave Kidna g`hot. So is da Michl z`friedn und guat aufg`legt durch`s Leben zogn.
Freile, oan Föhla hot er g`hot, der guate Monn. Oba a Föhla steht e an jedn zua, so moan i.
In Michl de seine hot Wirtin auf da Leitn g`hoaßn. Dort hot a holt kam vorbei geh kinna. Ob und zua, wonns holt grod passt hot, des hoaßt wonn de richtign beinonda worn, do hot`s eahm monchmol schon gonz g`woltig vawaht.
Do is a donn in Serpentinen durchn Pforrwold hoamzogn. Domols wor des jo nu ned g`fährli, es hot nur Rossfuhrwerk und Fohrradl gebm. Nebma Weg worn häufti Stoakugln und wonn da Michl in Schlongenlinien daher kemma is, homs eahm ned ausg`wicha. So hot a öfta a Heftpflosta braucht für sein Kopf. Oan Stoa den hotà oba nia übasegn, der wor nebm da Kreizung und des wor de richtige Sitzgelegenheit fürn Michl. Va dort hot a nimma weit hoam g`hot und dort hot a jedesmol a bissl ausg`rost und a wenig in Dompf o`lossn. Öfta is er dortn a wengl eitunkt und hot a Runde g`schlofa. Wieda is amoi so g`wen. Er is ba da Wirtin auf da Leitn g`sessn und a recht a Gaudi is g`wen. So is eahm ban hoamgeh wieda finsta wordn, oba sein Stoa hot a g`fundn, zan rostn. Do is auf amoi oana daherkemma, und wia der den Michl so sitzn siacht, hot a g`locht und hot hoamle g`sogt: „Na wort, dir hülf i!“ Gschwind is a hoamg`rennt und is mit an Tegl kemma, do is a einig`foan und hot in Michl so liab oiwei wieda o`gstreichelt. Wia der endli munta wird, sogt a: „Wer bistn du?“ „I bin da Buda Kogla“ hot da Mo g`sogt. Oba g`segn hotn da Michl net, wei`s so finsta wor. „Hiazt muass i oba hoamgeh, mei Weibi wird eh scho schimpfa mit mir!“ hot da Michl gsogt. „Und donk da schei, Buda Kogla dasst mi aufgweckt host!“
So is da Michl donn endli dahoam o`kemma, wor eh scho gegn da Friah. Wiara o`klopft hot, is sei Weibe, de Kathl, scho fuchsteifewüld außakemma. Oba wiasn mit ihrer Petroliumfunsn siacht, hot`s furchtbor zan schrein o`gfongt. De Lompn is ihr aus de Händ g`folln, und davong`rennt is. „Des is jo net da Michl, des is jo da Teifl!“ Da Michl hot jo wirkli wia da Lebhoftige ausg`schaut. Des G`sicht, de Händ, ollas kohlschworz eig`schmiert.
Da Michl hot g`sogt: „Wos plärrst denn a so, du dumme Urschl?“ Do is a in sei Stübe eine, wo er glei mit Gwond und Schuach ins Bett g`folln is.
Glei hot a zan Schnorcha o`gfongt und des is da Kathl bekonnt viarkemma. „Des is eh da Michl“ hots festg`stöllt, nochdems eahm schichti o`gschaut hot. Oba wia der ausschaut, des gonze Bett is voll Ruaß! Erscht in da Friah, wias eahm in an Sautrog voll Wossa g`huckt hot und eahm und des Bettgwond g`woschn hot, wor da Michl vanehmungsfähig.
„Wer hat da denn des o`to?“ hot eahm d`Kathl g`frogt. „Des wor da Buda Kogla“ hot a dazöhlt. „Der is oba recht liab za mir g`wen.“
„Na wort“ hot de Kathl g`sogt und is glei übas Brückl umi und üban Berg aufi zan Buda Kogla, do hots donn dumm g`schaut wei der is mit da Gipshaxn scho drei Wocha im Bett g`legn. Wer`s wirkli wor, wos in Michl eig`schmiert hot und an folschn Nom g`nennt hot, des is nia außakemma. Heit konn is varotn, es wor da Zechkompan van Michl, der wosn g`fundn hot und glei hoamg`rennt is um an Ruaß und a Wognschmier.
Heit lebt scho long koaner vo de, wos i dazöhlt hob. Üban Michl sei Pech is vü g`locht wordn, donn hot ma vagessn.
Nua den kloan Kindan hot ma nu long dazöhlt. „Geht`s jo ned ins Holz eini sonst kimmt eich da Buda Kogla und färbt eich ei!“

Abs.:
Sepp Peham
Kollmitzberg 24
3321 Ardagger
07479/7548