HoamatRundschau
Da Wösa Dialekt – so redn mia do
Wos is des eigentlich, Mundort und Hochdeitsch, wia redn mia do in Wös und stirbt da Dialekt aus?
WÖS & WÖS-LAUND. Mim Dialekt is des so a Gschicht: De Oidn sogn, dass a sowieso ausstirbt, de Jungen findndn oft uncool, und überhaupt was nermt so genau, wos des ondre eigentlich is, des Hochdeitsch. Wir hom uns ogschaut, wia mia do in Wös und Wös-Laund eigentlich redn.
De Hopf Angela is im Oimtoi, im Soizkommaguad aufgwochsn oba lebt seit dreißg Joa in Wös. Sie is Mitglied im Stözhommabund und schreibt ned nur auf Hochdeitsch, sondern a auf Mundort: "Des san zwoa unterschiedliche Sprochn. De Mundort bedeit ma sehr vü. Sie is mei "Herzenssproch", des san meine Wurzeln, mei Hoamat." In Wös, sogt sie, san verschiedene Dialekte vamischt und es gibt koa kloare Sprochidentität.
Mittelbairisch is ned Bayern
Formal gseng is Wös und Wös-Laund Teil vom mittelbairischen Sprochraum (ned zu verwechseln mit Bayern mit Ypsilon) – im Gegnsotz zum Allemannischen, des in Vorarlberg gredt wird. De londleifige Unterscheidung noch Regionen – Steirisch, Tirolerisch oder Mühlviertlerisch – is oba ned foisch, sondern gsöschoftliche Realität, sogt da Manfred Glauninger, Sprochforscher an da Universität z'Wern und Experte da österreichischen Sproch. Wos wia do 'Hochdeitsch' nennan, is oba eigentle 'österreichisches Deitsch', de Wissenschoft sogt dazu es is a Varietät des Deitschen. "A de in Österreich ois "Hochdeitsch bezeichnete Oat des Sprechens hod noch wie vor charakteristisch "österreichische" Merkmale", so da Glauninger. Und er moant, dass de Ongst vorm Aussterbn da österreichischen Sproch und vom Dialekt unbegründet is. Wos oba stimmt is, dass de Sproch se oiwei wondlt, des is natürlich, und deswegen redn de Kinda heid nimma so wie unsre Großötan domois, weis jo a nimma in der Zeit lebn. De Veränderung wird mit am Verschwinden verwechselt, sogt da Glauninger, weil ma glaubt, dass da Dialekt da Kindheit immer scho so gwen is.
"Mundort ois Oitogssproch"
Da Stözhommabund is da Meinung, dass zweng fian Erhoit da Mundort do wird. Benonnt is dea nochm Mundort-Dichter Fronz Stözhomma, da Dochvabond ist in Linz, danebn gibt's in jedm Bezirk a Gruppn. Eana Motto is "Verwendung da Mundort ois Oitogssproch stottm Einheitsdeitsch vom Medienzeitoita" und se woin de Mundort an de nächsten Generationen weidagebn. "De Mundort is zeitlos und wird wieder 'Mode'", sogt de Hopf, "bei de SMS merkt ma jo den Vasuach, se durch Mundort mitzuteilen." In Wös hod da Stözhommabund Onfong vom Joa an schweren Schlog erlittn, dadurch dass da Johann Kaiser, da longjährige Bezirksleiter und bekonnt a ois Nochtwächter, überroschend gstorbn is. Jetzt sois oba weidageh mit da Schreibwerkstatt "Spätlese", zu der olle an Mundort Interessierte eiglodn san. Olle zwa Monat find im Seminarraum vom Seniorenhaus Wös-Vogeweide-Laahen um 18.00 Uhr a Veronstoitung stott, des nächste Moi am 10. Juli und donn wieda am 11. Septemba.
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.