Weihnachtsgedicht übers Schenken und brav sein
Schenkn und brav sei
Jessas na, is da dös a Freid,
s`Christkindl is nimma weit!
In Amerika drent, do sogns Santa Claus,
owa ins en Pinzgau is dös a wüda Graus!
s`Christkindl woas vo Kindheit o und so sois a bleim!
Und hiaz tua i eam hoid a Briafal schreim.
Bescheidn wiarö bi, wünsch i ma heia gor nid vü:
I mecht gern an woarma Schuach für d`Köt und a fin Schnee,
midra guadn Soin unt`drauf - damid i`s a dasteh!
A feine Zuadeck va da Kaschmir- Ziege,
nocha schlof i wieda wia a kloans Kind in da Wiege.
Und wei i so gern roasn tua,
wünschat i mia an Travel-Check dazua.
Obs noch Thailand geht, oda noch Hawaii,
dös is mia völli oanalei.
Zan Schluß, i bitt recht schee,
mecht i an Christbam, midsomt an Gstöh.
Oowaaa, ob dös woi ollas geht?
Wias eppa do midn Brav sei steht?
Wei - d`himmlische Buachhoiteng is do gonz genau!
I moanat voi, dös mocht koa Mo, sondan a Frau.
De vagessn fei nix, wos dös gonze Joar is gschegn,
auf allen deinen Wegn.
Obs`t eppa woi nid gfluacht host gegan Herrn,
wei - wonn s' Vehikö spinnd, nocha passiert dös gern.
Host a neamp daschossn,
oda goa es 6. Gebot genossn?
Host nix beemisch gekafft und a nid glogn,
und nia wos untaschobn?
Genau a so muaß sei,
grod a so stehts in da obrig`n Ordnung drei!
V i e l l e i c h t huifts - a poa Wochn lee`m ois wia ra Engl,
und vagessn is de Zeit ois Bengl?!
Vielleicht is owa dös a zwench, nocha kunnt i mia denchn,
s`iss woi dös Joar nix midn Schenkn!
H.R.Guggenberger
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.