Brauchtum in Braunau

Unsare Brauchtumsvereine im Beziak

Goidhaum, Goasslschnoizer oder d'Voikstånzgruppn: Lauter Vereine, de an Brauchtum erhoitn. 

QUER DURCHN BEZIAK (kath). Im Beziak Braunau gibts jo bekånntlich sauvü Vereine. De homs oba leida ned oiwei leicht, dass an Nochwuchs finden. Vor ållem soichane, de wirkli nu auf gonz traditionelle Oat und Weise unsa österreichische Tradition erhoitn. 

Goidhaum, Goasslschnoizer und Voikstånzgruppn

Im Bezirk Braunau gibts insgesåmt 44 Goidhaum- und Kopftuachgruppn. Übers Joah verkaufen de Frauen imma wieda söibabastelte Såchan auf vaschiedene Märkte. Des Göid, des dabei einnehman, spendens an Familien, des ned so sche hom, oda an d'Lebenshilfe. Se mochan oba a vaschiedene Festl und Ausflüge und stärken so eana Gemeinschåft. Leida ist oba a so, dass junge Leid ned so wirkli intressiert, dass dazuagengan. "Für vü junge Leid is des einfoch z'vü Freizeistress und irgendwie is eana a unangenehm, wei d'Freinde donn bled redn oda lochan. Oba ma deaf mit am schen Dirndlkleidl mitgeh und wir gfrein uns üba a jede, de mitdoa mog", erzöht d'Wimma Brigitte. Sie is d'Obfrau vo de Goidhaum im Bezirk.
A bei de Goasslschnoizer schauts mim Nochwuchs ned grod machtig aus: Des Goasslschnoizen is in der Zeit entståndn, in der d'Leid nu koane Autos ghobt hom. Wias nu mit de Ross untawegs woan, hom si d'Fuhrleit bsundare  Schlågfoign ogeignet, damit a jeda glei gwisst hod, wer då daher kimmt. Ob da Sepp, da Frånz oda da Hias. Vor 50 Joah hom des donn vaschiedene Brauchtumsgruppn aufgnumma und führn des weida. Heitzutågs wird zu ana Musi gschnoizt. Zu vaschiedene Stickin, wia an Fuhrmånn, d'Ambospoika oda d'Schneid, wiad des Brauchtum erhoitn. De Goasslschnoizergruppn vo Mundafing is de oanzige Fuhrmånnsgoasslschnoizergruppn in unsam schen Bundeslånd. Momentan hans öif Schnoiza und oa Quetschnspielarin. De Mitglieder san zwischen 15 und 60 Joah oit. Da Probst Håns, da Obmann vo da Gruppn, darad si narrisch üba neie Mitglieda gfrein:"Natürlich hätt ma gern neie Mitglieder, voa ållem junge, oba ned a jeda nimmt se de Zeit für de Probeoabeiten."
De Voikstånzgruppen in Saiga Håns zöht momentan 54 Mitglieda. De jüngste is sechse, da öteste wiad heia 70. Entstondn ist des gånze foa 40 Joah. Tånzt wiad ålle zwoa Wocha, de kleanan vo hoiba sieme auf d'Nåcht bis åchte. Um åchte übn dånn de Großn. Tånzt wiad Volkstanz und da Landler. Oba a s'Schuahplattln und s'Singa übms oiwei wieda amoi. Damits naiche Leid kriang, hoaßts bei eana "Durch's ren kemman d'Leid zåm". 
Wås ålle drei und woahscheinli generell ålle Vereine im Beziak gemeinsåm hom is, dass duat nu d'Gemeinschåft glebt wiad.