Fasnacht 2015 in Telfs: Aufführung der Gruppe "'s Galtmahd" beim Schleicherlaufen

TELFS. Wie es bei der Fasnacht der Brauch ist, gehen die "sprechenden" Gruppen bei den öffentlichen Aufführungen nicht gerade sehr zimperlich mit den örtlichen OrtspolitikerInnen um, so manches gesellschaftliches Problem wird ohne Maulkorb, im Dialekt und überzogen zur Sprache gebracht. Deftige, heftige Sprüche und laute Marschmusik kennzeichnen die "Galtmahder", die mit ihren Sprüchen auch sehr oft den Nagel auf dem Kopf treffen - die Wahrheit tut schließlich weh! Viel Spaß bei der Nachlese!

Figuren / Darsteller (Abkürzungen)

Galtmohder (G) Christian Wirtenberger
Galtmohderin (Gi) Gerhard Pfurtscheller
Marcel Koller + Zombie (M) Robert Holzknecht
Teufel - Conchita (T) Michl Stanka
Arnautovic + Zombie (A) Peter Ziegler
HC Strache (HC) Stefan Wirtenberger
Vampir - Felipe (V) Erich Grill
Alaba + Zombie (Al) Wendl Neuner
Putin (P) Max Holzer
Platter (Pl) Hermann Wirtenberger
Bürgermeister (B) Reinhard Schreyer
Frankenstein (F) Andi Pfurtscheller
Hexe Hypo Adria (H) Dietmar Härting
Pilot (Pi) Alex Noldin
Zombie (Z) Rudi Hanni

AUFFÜHRUNG:

(Lied: Galtmahd beim Einfahren - Melodie: - gruselige Musik)
Gi: Pass au Bauer, sei vorsichtig, wart bis se kemmen,
mir lassn ins it inser Leibn nemmen.

G: Lang kennen mir insre schiane Alm nimmer dahaltn,
dia werd belagert vu Geister, Monster und gruselign Gstaltn.

Gi: Insre Goaß spieln verruckt, die Schof laffn davun,
und die Kiah giahn iatz sogar Menschn un!

G: Ja, mit der Sicherheit in Tirol isch es lang schua vorbei,
insre Kiah sein gfährlicher wia der Weiße Hai.

Gi: Fir ins tuat lei mehr oa Hoffnung existiern,
G: mir hom miaßn Geisterjäger, die Ghost-Busters engagiern.

(Melodie: Ghost-Busters)

Gi: iatz sein se endlich da, bewaffnet bis an die Zähne,
G: Bürgermeister Härting, Vladimir Putin und HC Strache
kämpfn geger paranormale Phänomene!

B: Mit der Waffn mach i alle Geister hin,
des isch mei „im Summer moch i Eis – Maschin“

G: Ma, geaht der Bürgermoaster mir aufn Wecker mit sein Eis,
seid zwoa Jahr hear i nix anders mehr wia den Scheiß.

P: He, wir haben Mission, diese Alm ist bald die meine,
ich mache gleich wie in Ukraine!

Ich komme mit Panzer, werfe Coktail von Molotow,
und schieße mit guter, alter Kalaschnikow.

HC: Und I blaues Mandl verjog die Geister mit mein Gwehr,
vielleicht derwisch i nou a paar Ausländer und Asylanten hinterher!!

B: Aber was tuat mit der Alm eigentlich sein,
schaug ja ganz ruhig aus und fein.

G: Wart bis se eintritt die Dunkelheit,
Gi: Schaug her iatz isch es sou weit!

(Hütte dreht sich - Melodie beim Drehen: Wölfe)

G: Iatz kimmt des erstes Monster, mein Gott naaa!
Gi: Es isch die böse Hexe Hypo Alpe Adria.

H: I treib a buntes Spiel, verleit die Bänker zu Bilanzfälschung und Korruption,
faule Kredite, Parteienfinanzierung und Spekulation!

In meinem Bann werd an jedem die Ehrlichkeit fremd,
i ziach in die Leit aus des letschte Hemd!

(Zieht dem Bauern des Hemd aus!)

H: Der Ecclestone, der Hoeneß und dia ganzn Kundn,
sogar in Telfs hab i Geldhex meine Opfer gfundn.

H: Weil trotz der Geldgier vun Haundl Toni werds es iatz decht a neis Schwimmbad derlebn,
miaßt ihm holt 2 Millionen und an Baugrund geibn.

B: 2 Millionen, bei so an Projkt, des isch decht it viel,
a inser Amtsleiter posaunt es überall herum, des isch a super Deal!

HC: Da fallt mir lei oa Statement ein, ganz prompt,
enker Amtsleiter isch die greaschte Pflaume im ganzn Gemeindeamt.

H: Jo, der tuat a oner vu meine Geldgierign sein,
bei oaner Beratungsfirma der Gemeinde stellt er si glei selber ein.

G: Jo sog amol, des isch decht a Kündungsgrund, isch des it verbotn,
Gi: Wen kümmerts in Telfs, vielleicht hot er in Haundl jo a finanziell berotn.

H: Es seids gleich wia mei Lieblingsschüler Haider war, so richtig zwieder!
HC: So, ausgrett iatz, Putin schiaß se nieder!

P: Ja, ja, mach ich schon,
aber eigentlich ich gar nix habe gegen Korruption!

B: Ja, dann werd i die Hexe vernichtn, lass mi lei machn,
Fotografierts mi glei, dann kunn I wieder amol aus der Zeitung ausilachn!

Gi: 20 Bürgermosterfotos in jedem Drecksblattl, i mag schua gar koa Post mehr holen,
G: Die Telfer kennen sei Gsicht schua auswendig malen!

HC: Hey, Happy Hippo Nimmersatt, iatz isch Schluss,
I vernicht di mit einem UntersuchungsausSCHUSS!

(Hexe läuft schreiend davon! - Melodie: Frankenstein - Herman Munster)

B: Ujei, den Frankenstein kennt in Telfs a jeder Depp,
isch des nit der Piercing Sepp?

F: I mach die Telfer Wirtschaft beleben, i moan tua i, was woaß i,
i bin ein wahres Wirtschaftsgenie.

B: Du kunnsch ja it amol redn, des isch ja zum Grausn,
besser Deitsch wia du kennen ja die Bewohner im neien Asylheim daußn.

F: Dir Härting, des tua i dir sagn,
wear i a nou a paar Piercing-Nadln eiajagn.

Eis werds enk olle no wundern und alle blearn,
weil i tua in Telfs der nuie Bürgermoaster wearn.

HC: Der als Gemeindechef macht gleich viel Sinn,
als wia die Conschita Wurst als Frauenministerin.

HC: Putin, schiaß glei, dass des Monster explodiert,
P: Na, Vladimir schießen nix auf Behinderte, der isch gehirnamputiert.

F: Nit amputiert, in Telfs da wissn des decht alle schon,
i mach beim Dr. Larcher Peter a Gehirntransplantation.

G: Und welches Hirn, setzn se dir donn dann ein?

F: Jo des vum Ex-Bürgermoster Opperer, des war holt fein!

G: Hosch den iatzamol gsegn, den hats vom Plätschern auschwämmt wia a Botox - Luader!

Gi: Jo, ausschaugn tuat er wia vom Spongebob Schwammkopf der Bruader!

HC: Aber koa Operation der Welt, macht di richtig schlau,
und desholb, glabs mir, wählt di a koa Sau!

Alle: Kopfschütteln „mhmhmh“

HC: So, gnuag iatz, fangs des Monster, lossts in koa Zeit verliern!
F: Na, i geah freiwillig a poor Silvester in der Unität Deitsch studiern!

(Melodie: Immer wieder Österreich)

G: Iatz werds krass, ohne Schmäh,
Putin, i glab da kimmt dei roate Armee!

P: Nix Rote Armee, des Fußballer, tanken in Seefeld Kraft,
des eure Österreichische Fußball Nationalmannschaft!

Al+A.: Heimat bist du großer Söhne und Töchter …

M: Töchter und Söhne sollt´s ihr singen, Burschen, wie oft denn noch,
i will mi nit blamieren vorm Landeshauptmonn Platter, des wisst ihr doch!

M: Grüazi
A: habe die Ehre
Pl: hello, how do you do?
Al: Heast Alter, i bin der Alaba, was is mit du?

M: Des isch ein echter Landeshauptmann, i schick euch gleich a Runde laufn!

A: Heast, Landeshauptmann, ich verdiene so viel, ich kann sein Leben kaufen!

Des hob i a zu dem deppatn Polizistn gsagt,
wo er mi hat noch der überhöhten Geschwindigkeit gfrag!

Al: Mit seim Porsche Cayenne gib er Gas und flitz davon,
vor allem auf der deutschen Autobahn.

M: Und iatz solln mir nou in Deitschland Maut zahlen, sag des Ferkel,
woasch eh, die wandelnde Lachfalte, die Angie Merkel.

I tua dem deitschn Weibsbild so und so nit traun,
dem Karl Dall unter den Fraun.

HC: Des versprich i enk: Wenn mir dia Maut zahln miaßn bei die Preißn,
dann brennen dia bei ins 50 € auf die Raststättn firs Scheißn!

(Melodie: Abfangjäger und lauter Knall - Hütte stürzt ein!)

Pl: He, logger bleibn, eis Heiter,
des war decht lei wieder a Eurofighter!

Gi: Ja spinnt der Fliager, deis kann er decht nit machen,
G: durchbricht die Schallmauer und lasst die Hüttn zammkrachn!

(Melodie: Major Tom - völlig losgelöst)

Pi: Insre Fliager sein alle lei mehr Schrott,
weil inser Bundesheer isch bankrott!

Über 1 Milliarde homma ausgebn fir dia Abfangjäger,
und iatz sein dia Tuifl wianiger effizient wia a Baseballschläger!

G: Sag nit Tuifl, iatz hom mirs Gscher,
schau, do kimmt schua der Leibhaftige daher!

(Melodie: rise like a phoenix)

Gi: An sellen Tuifl tuasch auf der gonzn Welt nit finden!
G: He, Tuifl, hasch du in Schwoaf normal it hintn.

T: Also bitte, im Gendern sind Sie nicht „in“,
wenn schon, bin ich die Teufelin!

Und mein Schweif, mein lieber Bauer,
macht meinen Song zum Gassenhauer!

P: Komm, Stracha, Vladimir dir helfen zu vernichten Wurst!
und wenn Weib tot, trinken Flasche Wodka gegen Durst!

T: Weib? Nehmen Sie nicht solche schlimmen Wörter in den Mund,
das heißt jetzt: Mensch mit Menstruationshintergrund.

B: Des Monster muaß weck, sag der Welt pfiat di und an schianen Gruaß!
HC: Aber die größte Strafe war decht, wenn sie in Mörtl Lugner heiraten muaß!

HC: Nacha kannt sie beim Opernball umarennen!
T: Und der Richard würd mich „WURSTI“ nennen!

HC: Kimm, mir schießn zu zwoat, isch nix dabei,
B: alle haben ein Ende nur die Wurst braucht zwei.

(Melodie: grün sind alle meine Farben)

G: Oh, Oh, die greaßere Plag, wia Durchfoll oder Schweinegrippe,
isch insre Tiroler Ober- Griane, die Felipe.

Gi: Schnell davun, des isch nit guat,
i glab, der griane Vampir will inser Bluat!

V: Bluat, na danke, des oane sag i Ihnen,
i mecht liaber an Brokkoli Smoothie mit viel Vitraminen!

G: Do geaht mer decht au im Sack drein mei Messer,
bei dia grianen ovo-lacto-vegetarischen Salatpletschnfresser.

V: I, als nuie Tiroler Grianen-Mutti,
hun den Plattner und seine Schwarzn schun auf Tutti.

Iatz muass in amol fuattern, sunsch weard er mir nou narisch, Güntherle des Chappy gibt’s iatz sogar vegetarisch.

HC: 12 % roach`n aus, und der Landeshäuptling tuat in die Hose scheiß`n! Wasserkraft, Kalkkögel, der werd si überall die Zehnt ausbeiß`n!

V: Iatz werd überhaupt alls andersch, weil oans steaht fescht,
in Tirol regiert die ÖVP schun seit der Pest!

G: Jo lei in Telfs da isch es mir nou nit ganz klar,
ob die Pest nit besser war.

HC: Es Grianen seids ja komplett deppat woarn,
100 auf der Autobahn, da kunn i glei mitn Radl fahrn.

V: Dafir weard insre Luft besser, ma atmet freier,

Gi: und wenn i an Schaß lass zahl i bald nou Abgassteier.

HC: A Ruah iatz. I glab bei dem grianen Gebein, muaß des a okölogische Hinrichtung sein

V: Schusswaffn sein mir sowisou zuwider,

HC: nocha mochn mir di halt mit der Sensn nieder.

B: So, die Alm isch befreit vu alle misteriösn Sachn,
iatz kanntn mir decht glei da a Gemeinderatssitzung machn?

Gi: Selbstverständlich Bürgermoaster, mir habm a selle Freid,
hol se glei, die Gemeinderäte, für alle Freibier gibt’s heit.

(Zobies treten auf: Peter, Wendl, Robert, Rudi - Melodie: Thriller)

B: A, hobs o paarr Millionen mit, des isch brav Leute, perfekt,
Do stimmen mir glei wieder o, fir a nuies Monsterprojket.

G: J o, noch Schwimmbod und Eisart miaßts in die Zukunkt schaun,
vielleicht tiats am Hackelebichl a Summerrodlbohn baun.

Gi: He, Gemeinderäte i schreis so laut, dass es hert die gonze Welt,
bevors wieder die Hond auhebs: Des isch inser und it enker Geld!

G: Drum, Bürgermoaster, oans merk i grad,
mir warn die ganzn Monster liaber wia der Gemeinderat.

Gi: Mir hattn zum Schluss lei mehr oa letschte Bitte,
nimm mit den Haufn und ab durch die Mitte!

G: Iatz sagn mir „Pfiat enk und Danke fürs Zualousnen,
Gi: machts es guat, und wenn enk amol a Monster plagn tuat,

Gi: bleibts logger und entspannt, lassts enk nit bringen draus,
Gi: weil die Monster
G: und die Deppatn,
Gi+G: dia sterbn nia aus!

TEXT Nazausgraben

D = Dietmar Härting
Ch = Christian Wirtenberger

D: Lieber Naz, liebe Nazin, liebe Laninger und rinnen, liebe Laningermuater
und Muaterin …

Na, des kunnsch it vorlesn den Binnen I -Kas,
der ganze Emanzn-Gender Scheiß, isch decht a Schaß!

Also nomol vu vorn:

Liebe Laninger, guat hobs des mocht, endlich isch se iatz vorbei,
dia 5-jährige Herwarterei!

Iatz werd wieder gfeiert, glacht und gsungen,
mir Galtmahder gfrein ins schua, die Oltn, wia die Jungen.

Die Jugend isch wichtig, dass a nuie Fosnachtler nochkemmen,
drum tuat heit inser Galtmohdnochwuchs die Begrüßung übernemmen.

Geah her iatz do, des isch ja decht zum Verdriaßn,
du solltesch iatz, wia ausmacht in Naz begriaßn!

Ch: Ey Spacko, eh, wia wia soll i des mochn, olls durchsuacht vo voarn bis hintn,
voll Fake, an Naz kunnsch weder bei Facebook noch bei Twitter findn.

I schwör, der isch Opfer, der kloaner Depp,
null Peilung, der hot jo nit amol WhatsApp.

D: Redn! Du sollsch was sagn! Mit deim Mund, schalt um in Hirn den Schalter!

Ch: OK! Sers Naz, was geht ab, Alter!

D: Sers Alter, tuat des iatz alles sein,
a bissl mehr Enthusiasmus bitte, des war fein!

Des isch insre Fosnachtspuppn, dia weckt alle Fosnnachtler ersch richtig au,
und was der alls kunn, des isch ja unglaublich, schau!

A Kloankind was racht und speibt, isch des nit phänomenal?

Ch: Chill dei Basis, des isch bei die Kids in der Puite ganz normal!

D: Ma, dia Jugend, dia Sproch, des Gwand – des isch zun Haar ausreißn,
die Hosn untern Orsch und an Gang wia a Kuah beim Scheißn

Ch: Scheißn, wer labert denn so an Bullshit, dia Zeit isch lang schua aus,
mir sagn: I setz an Obama ins Weiße Haus!

Und wenn i donn auf der Schissl sitz, schick im meiner sexy Bitch, der Elfi,
vu mir und vu mein Obama, gonz konkret, a Selfi.

Sorry! He straight shooter - check die Nudel, Alter! Was heit?
Na i bin bei so oaner Traditionistnveranstaltung, hun zach Zeit.

Jou - chillig, an Haufn Typn mit Bart, manche in Tussikleider, echt kess,
vorkemmen tua i mir, voll porno, wia aufn Conchita Wurst – Kongress!

Morgn? Eislaffn, hey Checker, bisch du total a Dummer,
des tian mir Telfer lei mehr im Summer!

D: So, iatz langs, bisch du wirlich so stockbled, i kunn des nimmer hearn,
koan deutschn Satz, lei Bleidsinn, Bua, was soll aus dir amol wearn?

Ch: Ja, mei – fir selle Looser wia mi, da gibt’s an mega Trick,
i machs wia der Piercing Sepp, i geah in die Gemeindepolitik!

D: Hasch wenigstens a Gschenk firn Naz, oder hasch des ebba vergessn,
sinsch kriagsch von der Laningermuater glei oans in die Fressn.

Ch: I hun mir denkt, was der au hat fir a abgloost Kappl,
da schaug er konkret, ey, aus wia a Lappl.

Drum kriag des funky Fosnachtsgenie,
echt Hommer, a spacigs Kappl vu DC.

D: Seis drum, so isch se holt, Naz, die heitige Zeit,
nichtsdestotrotz wünschn mir enk olle a „mega-geile“ Fosnocht heit!

Nazeingraben

A = Andreas Pfurtscheller
Sp: = Christian Wirtenberger
St = Stefan Wirtenberger

A: Liebe Laninger …
Sp: Stop! Nit eingrabn! Halt! Naz, bleib do, i will des nit,
A: Hey, chill dei Basis SP: mei Basis isch am Limit!

SP: Schnoater, wos geht ab, Lanigerluder,
ausnlossn, bitte, Hundefänger – Bruder!

Des kennts it tian eis Spacos, i kunn ohne Naz nimmer,
iatz wo i saufn, rachn und speibn kunn wia er!

Es Laninger, eis seids voll Assi, eh, wos soll des Gfahr,
koa Naz, koa Fosnocht - koane willign Tussn an der Bar!

A: Jo Bua, des wor auffallend, so isch es in der heitign Zeit,
die Wagn und Lokal worn überschwemmt vu Weiberleit!

St: Familie neu: Sie sauft in der Fosnocht als gabs koa Morgn mehr,
und er passt dahoam au, auf die Jacqueline Loreen und auf´n Jean Pierre!

Geah her Bua, die Fosnocht isch aus, du muaß´s oanfoch kapiern,
am besten tuasch dem Naz glei dei Abschiedsliadl präsentiern.

Sp: Jo, Naz, Jo, die Fosnocht die wor geil,
Schleicher, Herold, Jahreszeiten – mega style!

Saluti, alles tutti, navi, la villa,
Sauwaude, geah moch mei glei an grilla.

A: He Bua, wos singsch denn du fir Liader,
do kimmt jo koaner mit, wia bei die Soafnsiader!

Dei Text ergib koan Sinn, da kennt sich koaner aus,
sag, hat deis Liadl ebber gschrieben da Hechenberger Klaus?

St: Der findet für sei Stotterwerk bei Munde TV an Plotz,
der Möchtegernfosnochtsguru hot an Humor wia a toate Kotz.
Grottnschlechte Reim über ins Machomohder, des war für mi a Ärger;
Sp: He, cool down, who the fuck is Hechenberger!

A: Jo, recht hosch, lass guat sein de Gschicht,
leis gscheider fürn Naz a Abschiedsgedicht.

Sp: L-ie-ber Naaz, lei-der ist die Fos-nocht –

St: Vergiss es, Bua, wos isch denn des iatz gweisn,
du kunnsch jo no schlechter wia der Bärenobmonn Larcher leisn.

SP: Ey- jou! Des wor der Burnerslogan der Fosnocht: Schau, do entn hockt er
der erste Telfer Legastheniker – Doktor!

St: Der selbsternonnte Fosnochtsgott tuat in jedes Mikrofon des er ertappt, einiplärn,
red an Topfn aber er tuat sich jo so gern selber reiden hearn.

Ob mir Knödl machen darfn, fragen mir sicher nit di Larcher, mit dein Größenwahn,
hasch ebber an Neid, weil mir Weiberleit haben, dia ins Knödl dran.

A: Vergiss es, iatz werds Zeit zum „Pfiad enk“ sogn, zu olle Gruppen,
zur bestn Kindsdirn oller Zeiten und zu dir, liebe Laningerpuppn.

St: Jo Naz, schod, dass iatz isch olles wieder vorbei,
mir Galtmohder gfrein ins aber schua, wenns in 5 Johr wieder hoaßt:

Alle: die Fosnocht isch frei!

Zu den Texten der Gruppe der "Vogler" beim Schleicherlaufen 2015:
http://www.meinbezirk.at/rietz/chronik/fasnacht-2015-in-telfs-auffuehrung-der-vogler-beim-schleicherlaufen-d1240735.html
Texte der Gruppe der "Beasn Buam" 2015
http://www.meinbezirk.at/rietz/kultur/fasnacht-2015-in-telfs-auffuehrung-der-beasn-buam-beim-schleicherlaufen-d1240682.html
Texten der Gruppe der "Kurpfuscher":
http://www.meinbezirk.at/rietz/kultur/fasnacht-2015-in-telfs-auffuehrung-der-kurpfuscher-beim-schleicherlaufen-d1241727.html
Texten der Gruppe der "Soafnsieder":
http://www.meinbezirk.at/rietz/kultur/fasnacht-2015-in-telfs-auffuehrung-der-soafnsiader-beim-schleicherlaufen-d1242799.html
Texte der Gruppe "Bachoufn":
http://www.meinbezirk.at/rietz/kultur/fasnacht-2015-in-telfs-auffuehrung-des-bachoufn-beim-schleicherlaufen-d1248398.html