Fasnacht 2015 in Telfs: Aufführung der "Kurpfuscher" beim Schleicherlaufen

TELFS. Wie es bei der Fasnacht der Brauch ist, gehen die "sprechenden" Gruppen bei den öffentlichen Aufführungen nicht gerade sehr zimperlich mit den örtlichen OrtspolitikerInnen um, so manches gesellschaftliches Problem wird ohne Maulkorb, im Dialekt und überzogen zur Sprache gebracht. Seit dem Schleicherlaufen 1990 hält diese junge Gruppe der "Kurpfuscher" alle fünf Jahre den Mächtigen den Spiegel vom "ärztlichen Standpunkt" aus gesehen vor. Viel Spaß bei der Nachlese!

Beteiligte Personen:

Assistentin 1 (Assi 1): Jäger Rainer, Krankenschwester
Assistentin 2 (Assi 2): Riml Hannes, Krankenschwester
Online Doktor: Markt Werner
Handwerker 1 (HW 1): Widauer Rainer
Handwerker 2 (HW 2): Mair Manfred
Handwerker 3 (HW 3): Singhartinger Hermann
Handwerker 4 (HW 4): Lechner Markus
Handwerker 5 (HW 5): Mader Kurt
Rasta Man: Klieber Daniel
Hagele Conny: Klieber Markus
Türk: Langmaier Stefan
Türkin: Spiegl Daniel
Junge Türkin 1: Glatz Markus
Junge Türkin 2: Saurer Harald
Gotlspruch: Waldhart Hannes
Musik und Beirat: Pöham Hansjörg
Musik: Heis Alois
Technikmeister: Draxl Werner

Ablauf

Assi 1: Liebe Leut es erkennst es vielleicht schon, deiis weard die neue Kurpfuscher Ordination, Mir sein no nit ganz fertig, mir hab´n no an Streß,
drum helfen ins die Allround-Genies vom AMS.

HW 1: Was als Facharbeiter verdiensch deiis isch a Flop,
Drum sein mir flexibel, vom Rohrverleger bis zum Aushilfsdoktor mach´n mir an jeden Job. Und weil die Kasse die Ärzte in die Rente komplementiert,
haben mir ins sicherheitshalber an „Online-Doktor“ installiert.

ID: I bin der Doktor Internet,
I bin a do, wenn manch anderem die Lust ausgeht,
Weil, i buggl immer unverdrossen,
hab a nia wegen akuter Fortbildung geschlossen.

Assi 2: Mir kimmt vor, des Mandl isch no nit richtig programmiert,
hat halt decht nit so lang, wie der Doktor Böck studiert.
A richtiger Doktor isch mir sowieso viel liaber, der horcht mir auf die Lunge,
oder, wenns grad sein muass, macht er den Abstrich mit der Zunge.
Geht zurück zum Tisch

HW 2: Hasch schua keahrt: Die Portra Briader Werner und Ginther
Hab´n sich in der Sunnensiedling an Palast hinbaut, so groaß, den siecht sogar a Blinter!
Doppelt so groaß wie die Andern,
Doppelt so hoach die Mauer.
Deiis, Genosse, isch Gleichberechtigung pur,
Ein Hoch auf den Amtsträger der Sozial-Diktatur.

HW 3: Vielleicht hab´n sie do oben ihr Konto decht a bissl überzogen,
und deiis sollten iatz die ehemaligen Nachbarn im Föhrenweg ausbaden.
Aus dem Hoamhaus hat sollen wearn a 3 stöckige Wohnanlage für Leit dia leb`n auf großem Fuß, dann wohnaten in derer Sackgasse ja doppelt so viel! Deii ham woll an Schuß!

HW 2: Ja , in die Gemeinderatskollegen hat er g´sagt,
er hat mit der Nachbarschaft einvernehmliche Gespräche gepflogen,
derweil war alls derstunken und derlogen!

ID: Mah, als Vize Bürgermeister mit so einem sozialdemokratischen Gewissen, wars beste, es tat sich mit seim Gefolge nach Wolgograd verpissen!

HW 4: Du, Schwester! Die Geräte sein fertig montiert,
iatz war recht, wenn man sie glei ausprobiert.
Mei alte hatt vielleicht e a Gaudi,
i glab i probiers selber aus , i trau mi.
Setzt sich FLAK auf (Kiste mit Platz für 2 Fotos: Härting oder Scharmer AL, Wackerle und Stöfelz jun.)
Face Lifter Automatik

HW 4: Iatz ischs passiert!
Iatz hats mir, die ganze Fotze weckradiert! (Tafel mit Foto vom Stöfelz und Scharmer)

HW 2: Mah, a so a fad`s Gfries vu der Kuie bis zun Hirn,
heb no amol ei´a, du hasch nix mehr zu verliern.

HW 2: Iatz hasch a Larfe, die Freundlichkeit pur,
schaugsch aus wie a g`studierte-Frohnatur.

ID: Na, Na, i siehg do kein Licht,
weil: it alls was 2 Backen hat, isch a a G´sicht!

Assi 1: I hun´s gwisst: Deiis Gerät vom Bundesheer isch a alt´s Glump!
und Deiin, versteckst gscheider im Keller, bei die Akten, den unfreindlichen Hund.

HW 2 und HW3 stecken Stöfelz untern Huat - Reggae Sound

Assi 2: Mah, do kimmt oaner der mecht bei alle vorbei,
deiis kun lei a Pharmavertreter sei`!

Rasta: Deiis isch der neuer Inhalator für harte Fälle,
(zieht Riesenjoint heraus) do schneibts dir uan eine, aber blitzeschnelle.
Den hab i günstig vom Ridim erworben,
wenn do 3x ziachsch sein weck die Sorgen.
Manche Spezialisten ham an Schmäh, und deiin schun long,
willsch du ganz viel vergessen, nocha rachsch halt a Bong.
Da kunnscht die an nix mehr erinnern, und s`isch koa Verbrechen,
wenn nix mehr woasch, vu deine Versprechen.

ID: Iatz kapier i´s endlich, es isch zun Derwuzeln,
was die Politiker nach die Wahlen zuzeln!

Assi 1: Na, Danke. Oans isch fix.
Für insre Jugend isch deiis nix.
Mir sein it wia der Walch und seine Schianen,
Verkaff dei Glump lei in die Grianen!
Wobei, i glab, deii ham eh schun an ziemlichen Nebl in Hirn,
deii tat`n am liebsten alls legalisiern
Cannabis, Einwanderer und Schualen wo koaner a deutsches Wort derschreibt,
Die Hauptsach isch der Autobahn Hunderter, der bleibt.

HW 3: Was kimmt denn do für fuxsats Madele
I glab deiis isch die Conny Hagele.

Hagele: Ja Hallo, i bin schun do.
I hun a kloans Problem mit meiner rosaroten Haut,
weil schian langsam mei grasgriane Seel durchschaut,
Kennst eiis mir helfen, a Abdeckfarb, hat i im Sinn,
braucht it lang hebn, grad bis i Bürgermeisterin bin.
A gemeinsame Freilaufzone hun i gmacht für Hund, Radler und Rösser,
weil trainierte Wadl schmecken in die Hundsviecher besser.

HW 1: Du Conny, do hatt´n mir a tolle Maschin,
wenn do ei`a liegsch bisch glei Bürgermoaschterin.
Mir verwenden a a Concord Matratze, da liegsch Du sicher wie noch nie,
Mit Körber-Heiss-Konkurs-Garantie!
No eppas sog i dir wos i woas,
Der Tekcan isch aufs Ei`a liegen a schun ganz hoass!

Hagele: Na I will wia immer die erste sein,
drum schalt des Gerät glei ein.

HW 1 und HW 3 schalten Verwandlungsaustomat ein bzw. zeihen das „Verdeck“ zu - Rauch und akustische Effekte

HW 3: Schnell, schalt ab deiis Gerät,
sigsch du it wia schon der Dampf aufgeht.

HW 1: Ojeh, die nuie Photovoltaik hat soviel Energie herzuzzelt,
iatz isch sie uns glatt verbruzzelt.

ID: Ups, der Abgang war iatz a bissl hart, aber zumindest, bleibt uns a Fasnachtsobfrau derspart.

HW 2 Liege mit Kehrschaufel abkehren, Asche ins Publikum

ID: War lei blöd, wenn vor lauter Kleinparteien, der Tekcan Bürgermeister weard, weil nach die nuie Fasnachtsgruppe:“ Halbmond“, vor der Sunna durchs Dorf oageht!

Türk und Türkin kommen
Türk: Kennts eiis mir helfen mit meiner Alten; es isch ein Kraitz,
Seit 30 Jahr isch Sie da und kunn immer no nit Deutsch,
Beim Elternsprechtag bringt deiis koa Glück,
und eigentlich, isch Sie mir z´dick.

HW 2: Es isch ganz klar, lei Du kannsch es mit fassen,
muass Sie halt vor die Tür und unter Leut gian lassen,
A dahoam g`hört deutsch gred, dann wurdet sie a bald gscheiter,
und die Fratzen in der Schul`kammeten o amol weiter!

Türkin: Was hoasst I kun nit deutsch!
Woher megsch du deiis wissen du eingebildeter Socken,
wenn`s ganze Jahr im Gasthaus hocksch beim Zocken,
Iatz isch Schluß mit kochen, putzen und vermehr`n …,
Du hasch lei Angst, i kannt dir dahaom es G`simms oakehr`n!
Deine blöden Sprüch kannsch du dir spor`n,
und Zukunft mit`n Handwagele fohr`n.

Assi 2: Sei`s wias sei! Mir tian koan diskriminieren,
mir weardn sie iatz operieren.
Hock Di nieder, mach dir koane Sorgen,
von 5 sein ersch 6 g`storben

HW 2 und Assi2 legen Türkin auf den Tisch und ziehen „Verdeck“ zu

HW 1: So, her mit mein`Skalpell …

HW 5 bringt die Motorsäge

HW 1: … deiss isch mein Skalpell;
deiss tuat it weah und geaht recht schnell!
Akustischer Effekt „Fettabsaugung“

HW 2 und Assi 2 ziehen „Verdeck“ auf – Abgang

HW1: Mah, deii OP war iatz verruckt;
zoagt`s her inser nuis Produkt.

HW 5: Mah, iatz sein do zwoa Dünede

Ju Tü 1: So schaug´n heutige Mädels aus,
und mit Bildung weard no mehrer draus.
Schaug die die Aslan Aygül an,
was aus an Landei werden kann!

Ju Tü 2: Von Null auf Hundert zum Nationalrat mit fettem Lohn,
hat no Nix g´sagt! Und geaht mit 36 in Pension.

HW 5: Wauuu. Bei solche Hosn gabs kua Gemecker,
do hat´ninsere Madln a Rua, vor deii Tirggn-Checker!

Türk: Iatz hun i 2 fesche Frauen, dös isch schön,
hab nur mit zu kleiner Wohnung a Problem.

Assi 2: Dös isch kein Problem, da hilft dir sicher der Ortner; Immigrant Hans!

Türk: Wo finden „Infant“ Hans?

Assi 2: Der öffentlichkeitsscheue Zwerg,
wohnt zwischen Puite und Untertürkenberg.
In Richtung Puite zeigen und ins Haus schieben

HW1: So, Iatz laß mir´s, es isch gnuag,
Mehrer Theater paßt it a mol unter insern Kurpfuscher Huat.
Mir hoffen koaner isch ins beas; koaner muass leiden.
Die Fasnacht soll halt Fasnacht bleiben.

Hoffentlich habt´s beim Naz Eingraben wieder Lust.

Mir grüßen Euch mit am 3 fachen: VERPFUSCHT; VERPFUSCHT; VERPFUSCHT!

Gotl-Spruch:
Iatz kimmt no a wichtiger Spruch, nach inserem Spiel
und der bedeutet uns Kurpfuscher wirklich viel.

Mir bedanken uns bei unserer Gotl Doris für
Ihre Unterstützung und Großzügigkeit.

Mit Dir isch es, a schiane Fasnachtszeit.
An Bluamenstrauß als Dankeschön mir Dir bringen
und Dir inser Liadl singen.

Nazausgraben 2015

Naz, Steah au du verschlofener Socken,
heuer kunsch auf a frische Griete hocken.
Die nuie Kindsdirn, i siehgs schon von der Weiten,
do heart man anständig die Gloggen läuten.

Viel gibts zum derzähln, mei lieber Bua,
loahn di zrugg und lous guat zu.
Für Karierefrauen sein die Zeiten hart,
weil willschs wos werden, brauchsch heut zu Tag an Bimmel und an Bart.
Die Walser Doris hatt sich gscheider a eppas zuacha operiert
und nit Ihr Geld lei in den Stimmenfang investiert
Sie isch iatz weck mit ihrer glatt rasierten Kuie,
Der „Wirtschaftswunder-Stiergnagg-Sepp“ isch der Nuie
Dem seine Versprechen sein nachhaltig wie ein Tattoo,
und seins es nit, kimmt halt der Nächste und lasert ihn weg im Nu.
Insern Bürgermoaschter geht’s a schun besser, sehr angenehm,
seit er fleissig schmiert, isch es weck, sei Haundl Ekzem.
Der Salbentiegel für Vater und Sohn sollat 40 Jahr heben,
Isch lei die Frag ob`s sie`s derleben,
Oaner hats hockete, oaner die Geile!
Vom Reichtum kommt die Langeweile!
Oans sogn mir enk a no, es Hegl
Die“ grösste Komödie isch inser neue „ Wiggl-Waggl-Fasnachtsregel“ – Koaner kennt sich aus
Vorschriften, Auflagen ärger wia am Bau,
und s`Komitee blast sie au, wia a orschbuderter Pfau!
Die Regel sagt I muass es iatz lassn,
kriag schiensch a Straf für´s Zeitverprassen
I hoff lei, dass sich alle dran halten,
sinsch ham mir wieder den gleichen Scheiß, den alten.
Iatz brauchts nimma lang schlofn, am 1. Feb segn mir ins wieder,
do redn mir über andere Kaliber, weil:
I hun schun tramt vu so manche Ochsn,
I hun schun tramt vu so manche Kiah,
I hun tramt vum Komitee,
lei wos gscheits tram i nia.
Gute Nacht!
Und „verpfuschte Träume“

Nazeingraben 2015

Aschermittwoch (AM)/ Fosnachtler (FN)
AM: So wia eïs dreinschaugt`s kapiert`s eïs nit den Sinn,
drum so i euch, dass i der Aschermittwoch bin.
Seit dem Kinig`ntag habts eïs meine ruhigen Nachtl`n verhunzt,
und in die braven Talfer es halbe Dorf derprunzt!
FN: Als Fosnachtler sog I: Endlich was los, da gibt’s viel zum hearn und segn – a fulltimejob für die Munde TV Steffi,
und geaht`s nach`n Larcher Peter, geaht`s nägscht`s mal rund schun ab Josefi!
AM: Ja genau!
Mit der Kindsdirn, dem nuien Superstar, hat der Bua desmal schun soviel Kilometer oa`gspuahlt,
der isch iatz miad, der g`heart ins Grab eingwuahlt.
FN: Na grad deswegn mög`n mir´n no viel lieber, insern Laninger Fratz,
Mir packaten leicht no a poor Wochen mit Ziwui!, Verpfuscht! Und Guat Tatz!.
Auf`s Biabl mag i no nit verzichten,
und mecht a paar Sach`n no berichten

Lieber Aschermittwoch! Es war decht zum überlegn,
tat i Dir, grad derweil, als Zeitvertreib, statt`n Naz, eppern andern mitgebn:

Wia wars mit`n Stock, dem Vizebürgermeiser, der isch so interessant und engagiert,
den hat it amol oan oanzige Gruppe aufgfiehrt!

Oder nimm den Marlon mit dem halbwarmen Heiligenschein,
er soll nit grad der beste Freund vom Scheiring sein,
anscheinend decht nit geeignet als Pfarrer oder für`s Kloster,
grinst er iatz, voller Demut, vom H&M Werbeposter!


AM: Du, Zipfelkappele haltesch iatz die Pappn, du freche Piep`n,
Nit a jede hat enkere deftigen Sprüch derliet`n,
und selber habt`s a karnert, blärrt, sein enk die Nerven durchgangen,
habt`s bald an Stress in der eigenen Gruppe angfangen.
FN: Ja mei! Bei so viel Halli Galli und Durcheinand isch`s ins halt passiert,
mir hab`n ins entschuldigt und wieder die Kurve kriagt.
AM: Aha
FN: Und außerdem kannsch schun a mol die Nerven verschmeißen,
wenn dir d`Leit die Bude einspringen und die sudigen Weiber im Häusl neben die Schissl scheißen!
AM: Heahr au mit die Scheißhäusl-G`schichten und mit dia vu so manchem Garten,
weil do sein sowieso no a paar Fasnachtskinder zun derwarten.

I, der Aschermittwoch ,tua des Biabl fein verkalten,
Es Fasnachtler machts enk hoam zu eure Alten.

Heit um Mitternacht, Punkt Glockenschlag,
fahrt eurer Fosnacht ab ins Grab,

Gute Nacht und verpfuschte Träume!

Zu den Texten der Gruppe der "Vogler" beim Schleicherlaufen 2015:
http://www.meinbezirk.at/rietz/chronik/fasnacht-2015-in-telfs-auffuehrung-der-vogler-beim-schleicherlaufen-d1240735.html
Texte der Gruppe der "Beasn Buam" 2015
http://www.meinbezirk.at/rietz/kultur/fasnacht-2015-in-telfs-auffuehrung-der-beasn-buam-beim-schleicherlaufen-d1240682.html
Texte der Gruppe "'s Galtmahd" 2015:
http://www.meinbezirk.at/rietz/kultur/fasnacht-2015-in-telfs-auffuehrung-der-gruppe-s-galtmahd-beim-schleicherlaufen-d1240670.html
Texten der Gruppe der "Soafnsieder":
http://www.meinbezirk.at/rietz/kultur/fasnacht-2015-in-telfs-auffuehrung-der-soafnsiader-beim-schleicherlaufen-d1242799.html
Texte der Gruppe "Bachoufn":
http://www.meinbezirk.at/rietz/kultur/fasnacht-2015-in-telfs-auffuehrung-des-bachoufn-beim-schleicherlaufen-d1248398.html