Die Schuahch vom Nikolaus!

Innsbruck

Die Schuahch vom Nikolaus

Am 6. Dezember kimmp der Nikolaus. Alle Kinder sein aufgreg und putzn ihr Schuahch extra sauber. Manchmal kemmen a paar Engelen vom Nikolaus vorbei und legn eppes eini.
Aber meischtns kimmp der Nikolaus selber. Er lest aus sein goldenen Himmlsbuach und gibt die Kinder a Nikolaussackl.
Zur Daniela isch der Nikolaus ah selber kemmen. Er hat sei Buach augschlagn und hat glesn, dass sie a bravs Kind isch! Außerdem hat er glesn, dass die Daniela im Kindergartn guat aupasst wenn die Tante eppes vorlest.
Wia die Daniela 6 Jahr alt war, isch der Hl. St. Nikolaus `s letzte Mal kemmen und hat wieder ausn Buach glesn. Nacha hat er ihr an groaßn Sack mit Nussn, Apfelen, Orangen und a Schoklad gebn.
`s Madele hat in Nikolaus intressiert ungschaug, nah hat sie sich bedankt und a Gedichtl aufgsagt.
A paar Tag spater isch sie mit der Zenzi Oma spaziern gangen. Wia de Zwoa so dahinmarschiert sein, isch iahnen `s Moidal begegnet! Die Oma hat sich gfreit, das sie `s Moidal trifft und hat ihr dankbar die Händ gschüttlt! Die Daniela hat ihr ah die Hand gebn und hat sie intressiert ungschaug!
Nach an kloan Ratscher isch die Zenzi Oma mit ihrn Enklkind weitergangen.
Auf oamal isch die Daniela mittn am Gehsteig stiahn bliebn, hat in Kopf gschüttlt und ganz vawundert gsag: „Du Oma, ih muass Dar was sagn! Des isch soo wichtig!“
„Ja was isch denn soo wichtig“, hat die Oma neigrig gfrag.
„Oma, `s Moidal hat ganz dieselbn braunen Schuahch unghab wia der Nikolaus…..“

Lilo Galley