Tiroler Mundartkreis

Obfrau Lilo Galley stellt diesmal eine junge Mundartautorin aus der Wildschönau mit einem vorzüglichen Rezept, verpackt in einem guten Gedicht vor. Übrigens war Gertraud Siedler vor kurzem Ehrengast, nämlich am 7. Juni beim Mundartgsang in der Mehrzweckhalle in St. Ulrich am Pillersee!

Lamm – Rezept

Wui`st koch`n heit an guad`n Brat`n,
dann ku` i Dir oas bloß rat`n:
a Lampi – Fleisch, es war daweascht,
daß eanz es amoi ausprobiascht!

Ma braucht bein Koch`n nit amoi vui toa`,
wie es kocht se fast vo`alloa.
Krad eppas – des muaß i glei no sag`n:
A bißl Zeit solls`t scho übrig hab`n!

A Lampi – Brat`n braucht sei Zeit –
sonst hast danach bei`n Ess`n koa Freid …

Zerscht hoazt amoi des Backrohr vi`-
so auf a 210°C tua`s i,
nachand reibst no glei,
`s Fleisch mit a bißl Olivenöl ei`.

Dann salzen, pfeffern – ja nit spar`n –
Soit`st bei`n Ess`n a no was g`wan.
In an Lacki Olivenöl,
brat`st iatzand no des Fleisch u`, schnell.

`S Fleisch tuast eichi an a Rein –
Sie muaß nit schön, krad feuerfest soll`s sei.
A des Fett, was a da Pfann`in tuat ibrigbleib`n,
kust iatz no an Zwiefi und a bißl Speck eichischneid`n.
A`röst`n, auf`n Fleisch verteil`n,
z`letzt no a wenk g`hackten Rosmarie dribastreu`n.

Iatz war`s halt no woitan guat,
wenn eanz no a paar grob g`schnittene Karott`n und Easchtäpfi dazuatuat.
Kümmel, Tomatenmark, Koriander und a paar Wacholderbeer`n find`i,
send no `s Tipftei auf`n i.
Z`letzt no aufgiaß`n mit Wasser,
das krad no da Speckmant`l schaug`aussa.

Brauchst nit amoi an Decki fi de Rei`-
Soid nachand ois schön knusprig sei`.
Iatz auwa schnell damit eichi an Heascht,
damit `s Fleisch auf z`Mittag hi`no weascht!

De naxt`n 3 Stund` hast Dei Ruah,
vielleicht giaßt a diam auf, so ab und zua.
A paar Nudeln kust inzwischen sied`n –
Sonst brauchst Di` nimma recht bemüh`n.

Bis z`Mittag hast an super – Brat`n –
A so tuat `s Lampi oiwei krat`n!

Foto: Kaller Walter