Lesergedicht
Advent 2020
Anders is d`‘Adventzeit heier –
stui und stad , des is`s ja nia –
mir is des ned ganz geheier ,
lauft ned rund , so kimmts ma viar!
`s Haus ned ohne Grund verlassn ,
nur mit Maskn gehst wo `ei.
Einkauf möglichst kurz dann fassn
und im Wirtshaus derfst ned sei!
Tuat ma des genau betrachtn:
richtig is des, ned verkehrt !
Gsundheit is recht hoch zu achtn -
des had uns de Zeit scho g`'lehrt !
Gibt Vernünftigers ois kaufn –
mach ned mit, es had koan Sinn!
Bloß vo Gschäft zu Gschäft nuh laufn,
ohne Zui, ganz wurscht wohin.
Wiavui Kranke müassn leidn?
Wiavui Menschn müassn sterbm?
Vui toan ohne Abschied scheidn –
Load und Trauer toan s` vererbm!
Tua ned jammern, na , sei dankbar,
froh, um des, was du oiss hast!
Dankbarkeit macht Wunder wahr –
leichter z`tragn is jede Last !
Mach a Liacht, lass brenna d`‘Kerzn,
bitt für de, de`s schlecht iatz geht!
Scheint a Liacht in Menschnherzn –
Kerznschei für d`‘Hoffnung steht!
Von Anita Sattlecker
Kommentare
Du möchtest kommentieren?
Du möchtest zur Diskussion beitragen? Melde Dich an, um Kommentare zu verfassen.