Fasnacht 2015 in Telfs: Aufführung der "Beasn Buam" beim Schleicherlaufen

TELFS. Wie es bei der Fasnacht der Brauch ist, gehen die "sprechenden" Gruppen bei den öffentlichen Aufführungen nicht gerade sehr zimperlich mit den örtlichen OrtspolitikerInnen um, so manches gesellschaftliches Problem wird ohne Maulkorb, im Dialekt und überzogen zur Sprache gebracht. Ganz "beas beas beas" nehmen die "Beasn Buam" das Ortsgeschehen auf die Schaufel - deftige Sprüche zu den Um- und Zuständen in der Gemeinde haben die "Spitzbuben" der Telfer Fasnacht sehr böse in die örtliche "Munde Schau Schau"-Sendung verpackt! Viel Spaß bei der Nachlese!
(Regieanweisungen sind in Klammer)

(Beginnmelodie, MODERATOR Klaus Zeni: mit Glatze wird noch gepudert und der Kameramann (Karl Saurer) macht die Kamera bereit)

MODERATOR Klaus Zeni:
Miar vun Provinzsender Munde-Schau-Schau,
zeichnen iatz die nächste Sendung au,
bunt gemischt sein insre Themen,
dei mar unter die Lupe nehmen,
heind sei’mer zu Gast in der Eis-Spott-Arena,
s‘Eislaff’n in Telfs isch nämlich a a Thema.

(Junger Bursch (Simon Stiegl) mit Kappl schräg au fährt mit Auto und schmeißt Mc-Donalds-Mull aus dem Fenster)

Als Erschts bericht mer aber über dei Fock’n
dei in die Auto drein in McDONALDS auspack’n
derzua saufn sa a RED BULL,
Alter, deis isch s’Leben, deis isch cool.
Kaaam dass sa in Hamburger zommpatscht hobm,
weard s’Fenster autun vun Wogn,
und außa vunn Grattn mit dem gonz’n Mull,
wer den auraumt, interessiert se Null!
Und weil ma grod nou soachn muaß,
kriegg der Bluamentrog a an Guuuß!

(Es kommt der Straßenkehrer mit Müllkarren und Besen und räumt den Müll wieder auf)

STRASSENKEHRER Rudl Fiegl:
So ischas und i kannt‘ grod plearn,
i muaß den Scheißhauf‘n zammenkehrn.
Vun Jausnpapier bis zun Kaugummi
alls haun sa alls auf d’Strassn hie.
Wenn grod uaner auf mi lousnan tat,
i (!) - hatt‘a Super-Lösung parat:
Statt in Turnsaal umanonderhupfn,
kannt’n sich decht die Schualer um die Papierln buckn!
Lehrer! Gebbs decht i dei Huarn-Fratz’n,
a Paarl Handschi für ihre Pratz’n,
dazu a Zangl, an Sack und an Bes’n
und die Strass’n sein dreckig gewes’n!
Fein seiberli hommsa deis all‘s zommantrogn,
wo sa in Vortog weck gschmiss’n hobm.

(Ein Jäger mit Wetterfleck und Gewehr fährt geduckt auf dem Eilaufplatz umher und hängt Fahrverbotstafeln für Radfahrer auf…)

MODERATOR Klaus Zeni:
Danke Horst, deis leichtet ein,
vielleicht bau’n sa deis decht amol in Lehrplan ein.
Miar kemen iatz zu dei grieanen Mander,
dei laffn in Wold daussn mit‘n Gwehr ummanonder,
Ja meine lieben Fernsehzuaschauger,
iatz kriegt amol a Jager uans auf‘n Sauger!
Der Mühlmann vun Thöni drein,
dürft sicher it gonz sauber sein.
Regt sich decht dei dumme Sau,
über alle Mountainbiker au!
Losst Tafalan auhängen und sperrt die Wege,
grod dass er a Ruah hot, im Gehege.
Arthur! Bittschian pfeiff den Vogl zrugg,
und jagnan wieder oa, auf Innsbrugg!

(Ein Eisläufer mit Schild fährt umher und zeigt „WERBUNG“ Die Kamera zielt auf dieses Schild… Piercing Sepp mit Oberkörper frei, Ringe auf Brustwarzen etc…. Blonde Perücke)

PIERCING-SEPP – Leo Scharmer „Meissl“:
Hobbts eis schunn ein Tattuuuuuu?
Wenn it, kherts bei mir in Gschäft daussn zua.
I stich eich do für wenig Geld,
auf’n Orsch aua wos euch gefällt.
A Hirschgweih auf des Mädls Rücken,
bringt die Burschen zum entzücken,
und am Busen a kloans Blümelein,
kannt in a poor Jahr a schians Sträußl sein.
Ganz neu isch unsere Aktion für Babies und Hund,
dei tätowier mer heuer besonders bunt.
A fürn Vornamen vu enkern Schatz,
find’ mer natürlich ---- an schian Platz.
Und sollt deis Gspusi amol zu Ende sein,
fallt ins schua a Lösung ein.
Botox spritz mer in alle Falten,
mir wear‘n enker Facelift gestalten,
i moch enk alle happy,
sogg‘ enk - der Piercing Seppi!

(Herd mit Backrohr steht am Wagenende und ist eingeheizt…)

MODERATOR Klaus Zeni:
Liebe Fernsehzuaschauger und -innen,
iatz weard enk glei s’Wasser im Maul drein zommen rinnen,
weil es sein die Oberländer Dosenköch am Zug,
dei zoagn enk wos in Ofen drein brutzln tuat.

(2 Köche kommen aus der Hütte in Fassln stehend)

KOCH 1 – Daniel Thurnbichler:
I hoaß Felix und er isch der Heinz
miar kocha heind gonz eppas Feins!
Und zwor an gfüllta Teddybär,
deis geht gonz unfach und isch it schwer.
Miar schneidn au die Wampa vu den Viech,
tian Kräuter eia und nahnan zua mit 3 Stich.
Im vorgeheizt‘n Rohr,
isch deis Bärl bald amol mooohr.

(1 Teddybär Normal, 1 Teddybär verkohlt oder dunkel-braun.)

KOCH 2 – Martin Unterburger:
Richtig gschmacki und wirkli zun empfehla,
sein do derzua vun Felix die Fiseela,
deis gonze Gmies bis hin zu die Soßn,
kimmp bei ins sowieso lei aus Dosn!
Drum isch inser wichtigstes Küchagerät,
a Dosaöffner – vun KitchnAid.

KOCH 1 – Daniel Thurnbichler:
I Schaug amol eia in deis Rehrl,
wia’s n geaht – insern Bärl,
mir isch do a bissla zviel Rach,
hoffentli werd deis Viech it z zach.
Tua aussa iatz a Besteck,
dem brecha schua die Loscha weck.
Schaugg’s amol wia deis schiana Viech,
dunkelbraun und knusprig isch.

KOCH 2 – Martin Unterburger:
Als Zuaspeis empfehl'mer a Erdäpfelpürre
dass deis vun Pfanni isch, deis wissts eh
Und isch do no bisl a Maggi drein,
nach passt des a zu Wild, Fisch, Hendl und Schwein.
A Guats Gelingen beim nachkocha,
mir segn uns wieder, nächste Wocha!

(Es fährt ein Pozilei-Auto die Runde und ein Putz steigt aus. Geht zum MODERATOR Klaus Zeni: …)

MODERATOR Klaus Zeni:
Miar werfen iatz an Blick auf die Pozilei
an der kemmenmar uafach it vorbei!
Wenn sa it grod im Post’n daussn hockn,
tian sa die Buabm mit die Moped au bockn,
aua mit’n Grattn auf die Rollen,
die Alt’n derhoam wearn die Strof schua zohlan.
Herr Inspekter, Freund und Helfer,
gor a so meignsa enk it , die Telfer?

POZZILIST – Michael Lang:
Miar sein derzua do, dass ma ins it mog,
deis spür mer natürli alle Tog,
kam keman mir privat in a Bar,
isch dei in 5 Minut‘n laar!
Aber der Verkehr taat kollabiern,
taatn miar it alles kontrolliern.
Jed‘n Tog weard vu ins kassiert,
wer bein Autofohrn telefoniert,
an Fufzger kostet deis Delikt,
bein okassiern do seimer strickt.
Seit miar in Telfs in SASCHA hobm,
geahts mit die Strofgelder richtig noch obm,
der nimpp sogor sunntogs bein Ruetz-Beck,
i die Semmlholer s’Geld aweck.
Bein Fugger duntn ischas bsunders schian,
wenn mer um der Kurve dentn stian,
do hommer schua viele Burschn,
ohne Sicherheitsgut derwurschn.
35 Euro bringt deis dem Staat,
weil miar sou guat sein und auf Draht!

(Ein zorniger Bürger hupft von der Seite auf den Fasnachtswagen…)

WUTBÜRGER – Sebastian Waldhart:
Alter, geah hear mer au mit den Scheiss,
enk geaht decht überall lei der Reis!
Wia sa bein Zorzi duntn einbrochn hobm,
hobbs enk in Post’n daussn vergrobm,
ersch wie die Ganoven verschwundn woarn,
hot ma enk gsechn zuacha fohrn,
do hobbs nocha ermittelt und protokolliert,
weils gwisst hobbs, dass enk nichts mehr passiert.
Vu miar aus kannts eis enkre Waffen,
s’ganze Johr in Post’n daussn lassn,
dei behindern enk eh lei bein laff’n,
wenn sa wieder amol irgendwo raff’n.

(Lahmer Funkspruch an Pozzilisten: Streichenhörnchen an Wagen 1: Schlägerei Im Loco Coco...)

POZZILIST – Michael Lang:
I hunn iatz leider gor kua Zeit,
bin bei wichtiger Pressearbeit,
wenn sich die Streithähn wieder vertrogn,
wear mar se in Postn daussn befrogn.
Out und over!

MODERATOR Klaus Zeni:
Sou, Bürgermoaster, iatz geahts um di,
tua d‘Laschn au, und horch guat hie,
der Kapeller Rudl vu der Eislauf-Hüttn,
tat iatz um deine Aufmerksamkeit bitt‘n:

KAPELLER RUDL – Ronnie Zimmermann:
In Opperer hots auf di Pappn ghaut,
weil der hatt‘ insern Wendelinus verbaut,
und du, entschuldige – Einfaltspinsl,
glabsch in Eislauf-Ganner sein Gewinsl!
Jeder hots gwisst und viele homm enk grotn,
lassts decht vu den Projekt die Pfotn!
Mit aller Gwalt hobbs dei Eishalle durchdruckt,
i bin mir sicher, eis seid’s verruckt!

Wer zun Teifl mecht in Summer eislaffn gian,
deis isch decht lei in Winter schian.

Miar hobm ins do an kluan Eislaufplatz baut,
weil in guat‘n Platz bei miar daussn hobbs o‘gebaut,
do kennen insre Kinder wie in frühern Zeiten,
mit die Schliitschuach umanodergleitn,
und brauchn it auf dei nuie Halle wartn,
do fohrn jo noch eh lei die Innsbrugger Krawattn,
weil dei wearn sicher um die schianstn Zeiten,
mit enk Telfer unanonder streitn.

MODERATOR Klaus Zeni:
Weil miar grod sou guat bein schimpfn sein,
blend mer deis Interview mit an Arbeiter ein:

(Hat die „Blaue“ an und mit Schaufel...)

EIN ARBEITER – Christoph Thurnbichler:
De Felipe und der Platter – des Dream Team,
dia sein Schuld, dass i iatz ålm z’spat in’d Arbat kimm.
Håt ins decht des grian-schwarze Paarl
an Hunderter verordnet – auf a Jahr’l.
Deswegen darfsch bei ins auf da Autobåhn
lei mehr im Schneggntempo umanånderfåhrn.
Und beim IGL håt ma miassn die doppltn Stråfn måchn,
des bringt mei Wuat endgültig zum überkochn.
Hauptsach in Deitschland daussn
darfn se mit über 200 durch die Gegend sausn.
Des alluan isch es åber no it,
de zåhln ja a går kua NOVA nit.
Håbts es enk amol überlegt, dass mir für jeden Kårrn
in Öschterreich do 20% mehr Steiern zåhln?
Und trotzdem isch der verfressene Stååt
ständig in finanzieller Not.
Derweil mir ålle Tåg in’d Årbat springen
Låssn sich Sozialfäll die Pizza und die Tschigg min Taxi bringen.
I dia miassat ma wirklig is årbatn beibringen
damit se sich’s fressn und saufn amål selber verdianen.
Mir roacht’s schu lång, i kunns enk sågn,
eigentlig soll’t ma ålle Politiker zum Teifl jågn.

MODERATOR Klaus Zeni:
Womit mer iat beim Newsflash sein:
KOMPOST - Am Montag stinkts wieder in Telfs-Ost, weil er wieder umdraht weard - der Kompost.
LOGO - Die Gemeindewerke Telfs hobm sich für a nuis Logo entschiedn, die Leistung isch die gleiche bliebm.
AUSLASTUNG - Schon wieder 2 Hund mehr in der Freilaufzone, die Auslastung ligg iatz bei 2%, deis isch woll nit ohne!
STRASSE - Der neue Streetworker hat sich gut eingelebt, und sein Dienst glei in die Karenz verlegt.
MARKTGEMEINDE Der Gmua-Amtsleiter war leschtes Johr lei 12x krank,
Gott sei Dank!
BÄCKEREI Nach Negerbrot darf ma iatz a nimma Türggnbrot sogn,
bei Bäck muaß ma iatz um an Migrantnloabala frogn.

(2 Huntelen Die sich beschnuppern, dann aber gleich zur Sache gehen und aufreiten…)

Hundebesitzer 1 – Josef Otonicar
Mei, nimmst Deinig’n bitt‘ scheen an die Leine,
weil mei Bella is nit olm die Feine
und a in der Hundeverordnung drein steht
dass ma als Herrl an der Leine geaht!

Hundebesitzer 2 – Simon Stiegl
Scheiss drau, i loss in Rex olm a so laffn,
Sinsch soll’n se holt a bissl raffn.
Wos i aber siech, tian sich dei guat vertrog’n,
der Deinige weard bald amol Junge hob’m.

Hundebesitzer 1:
Ausanonder do! Hobbs eis ka Ghear,
Bella kimm, miar gehn jetzt zum Friseur!
Der Zorzi-Fred werd di duschn und föhnan,
der tuat in Telfs do Huntelen verwöhnen,
und wenn brav bist such i dir für kalte Tog außer Haus,
bein Fred draussn a warms Jeans-Jaggele aus.

Hundebesitzer 2:
Rex, mei Bua, wos hot er do gmocht?
A Hundsgaggi – in aller Pracht!
Do stülp i drüber, deis grieane Sackl,
und klaubs au, deis warme Packl.
Oa dermit, zu die Leit,
noch homm dei a amol a Freid!

MODERATOR Klaus Zeni:
Deis Beste kimpp ollm zun Schluss,
den präsentier i iatz mit Genuss:
CIRINELLA – die Eilaufprizessin,
legg enk iatz a poor Figirlan hin.
Als erstes seggs an uanfachn Dolup,
gefolgt vun an Lutz und an Doppel-Axl,
schauggs amol, wie’s grod flieg, deis Haxl!
Salchov und Rittberger, noch isch genug,
miar sein mit der Sendezeit schon in Verzug.
CIRINELLA, meggsch du a nou wos sogn,
vor mer mit’n Eislaufplatz weiterfohrn?

CIRINELLA – Florian Ciresa:
Ja bitte, ein großes Dankeschian an den Gemeinderat,
der mit Weitblick die Eishalle beschlossen hat.
Ohne dei mutign Frauen und Mander,
laffat mer in 10 Johr ollm nou auf selche Plätz‘ unanonder.
Auch dem Dr. Ganner….

MODERATOR Klaus Zeni:
So iatz isch gnuag, miar hob leider it alls dersogg,
wos ins die letschtn 5 Johr hat plagg,
miar fohrn iatz weiter, miaßn Huam,
es griassn enk – (Bease Buam zusammen:) die Beasn Buam!

NAZAUSGRABEN am 6. Jänner 2015 – BEASE BUAM

STERN: (Franz Stubenböck, sen.)
Griass enk Laninger und alle miteinand!
Bitte wundert’s enk nit über mei komisches Gwand.
Aber oaner alloan von ins isch heit zwianig
drum begriassn enk heit die Beasn Kinig.

KASPAR (Martin Unterburger)
Beasamaleikum!
Über die Puite kemmen mir her,
drum hamma fast koane Geschenke mehr.
S’uanzige was i hun kennen no versteckn in seiner Weihrausdose
war mei letzte saubere Unterhose.

MELCHIOR (Christoph Thurnbichler)
Naz’l – vum Weihrauch weasch du a it gar so oft tramen,
drum kriagsch von ins glei an schwarzen Afghanen.
Und wegen die Buz brausch di a nit genieren
weil dia tian eh viel liaba Autofahrer schikanieren.

BALTHASAR (Daniel Thurnbichler)
Kloana Hegl – a mir wissn, du warsch gern a Beasa Bua
und deswegen steht dir a von ins a Anzügl zua.
Lass dir’n glei schian unlegen von deiner Laninger Truchn,
Na kunnsch ins am 17. Jänner beim Bease Buam Festl besuchen.

STERN (Franz Stubenböck sen.)
Aber Laninger, passts grad auf enkern Naz’l au
weil die Behörden ham da schon a Äugl drau.
Dei kemmen daher mit Vorschriften und Gesetz
derweil mechtn mir alle lei a bissl a Hetz!

ALLE
Weil Fasnacht isch lei alle 5 Jahr
sagn enk
KASPAR, MELCHIOR und BALTHASAR
(und i mitm Stern)

NAZEINGRABEN - 2015

Laniger, eis altn Hundsfleischfresser,
seid’s eis sou deppat, oder kenntsas it besser,
der Spruch vun Heinzi isch unnötig gwes‘n,
selle Landler kennt‘s zukünftig vergess‘n.

Und in die Kurpfuscher mecht‘n miar Beasn Buam sogn,
Fosnachts-Gotln haltet ma hoach und tuat sa it plogn!

Schian ischas gwesn mit dem „Naz on Tour“,
Hegl, enker Kindsdirn war a super Figur!
Lei dem Steirer war wieder amol it klor,
wos huira deis Thema vu die Soafnsieder war,
miar glabm aber es isch a Tatort gwesn,
ma hot nämlich jede Menge Toate gsechn!

Lobm mecht mer a deis Komitee,
dass deis viel z’groaß isch, wiss mer eh,
aber wos tat’n sinsch dei gonz‘n Herr‘n,
miassat’n derhuam deis Gschwafl vu ihre Weiber unhearn.

Leider gibb‘s in Telfs kuane guat’n Friseer,
den homm die Bär’n vun Landeck dobm her,
spielt aber kua Rolle, wos kostet die Welt,
seit’n Bärnball schwimmen die sowieso in Geld!

Nette Madl‘n war‘n heuer unterwegs im Dorf,
und viele vu denen worn sou richtig scharf,
die Beasn Buam tat’n bitt‘n,
lossts enk a untern Johr amol….blick’n.

Vu ins aus kennt‘s iatz deis Biabl vergrobm,
miar hobm iatz an Durst und an laarn Mogn,
heind loss mer‘s nou amol richtig krach‘n,
ab morg’n geahts wieder um unwichtige Sach‘n!
Nieder die Fuhn‘, Beaser Bua,
miar ruafn dem Naz die leschten Grüße zua!

Zu den Texten der Gruppe der "Kurpfuscher" beim Schleicherlaufen 2015:
http://www.meinbezirk.at/rietz/kultur/fasnacht-2015-in-telfs-auffuehrung-der-kurpfuscher-beim-schleicherlaufen-d1241727.html
Texte der Gruppe der "Vogler" 2015:
http://www.meinbezirk.at/rietz/chronik/fasnacht-2015-in-telfs-auffuehrung-der-vogler-beim-schleicherlaufen-d1240735.html
Texte der Gruppe "'s Galtmahd" 2015:
http://www.meinbezirk.at/rietz/kultur/fasnacht-2015-in-telfs-auffuehrung-der-gruppe-s-galtmahd-beim-schleicherlaufen-d1240670.html
Texten der Gruppe der "Soafnsieder":
http://www.meinbezirk.at/rietz/kultur/fasnacht-2015-in-telfs-auffuehrung-der-soafnsiader-beim-schleicherlaufen-d1242799.html
Texte der Gruppe "Bachoufn":
http://www.meinbezirk.at/rietz/kultur/fasnacht-2015-in-telfs-auffuehrung-des-bachoufn-beim-schleicherlaufen-d1248398.html