Koschuhs Kastl 47

Haben's schon g'hört? Volle zach!

Haben‘s schon g’hört? Die Schilift derfn trotz Lockdown aufmachen. Zumindescht, wenn’s an Schnee, also an „Flockdown“ gibt. Und wissen‘s, was die Liftler bei die Schlepplift ungestraft tuan derfn? Statt Popo-Grapschn haun‘s da a Corona-Spritzen in den Oasch. Bügel herrichten und zack! Bevor di wehrn kannsch, bisch schon im erschtn Steilstückl und muasch di feschthalten. Patscherkofl oder Seegruabn kennen mi amal! Ob de an Schlepplift ham oder nit: De sein ja nit ganz sauber! Woher i des hab? Hat mir oana auf so oana Demo erzählt.

Dem sei Freind kennt oan, von dem der Schwager bei der Bahn arbeitet. Und der hat des im Internetz glesn. Wahnsinn, ha? Und wenn als Ungeimpfter zum PCR-Test gehsch, kriagsch a Wattestabele einigstopft, des sie davor mit dem Pfizer-Impfstoff tränken. Schluckimpfung quasi. Isch a Insider-Info von am Innschbrugger Gemeinderat, der früher bei der FPÖ war und jetzt nimma. Is ma wuascht, ob bei dem der Schilift nit bis ganz nach oben fahrt. Der isch Politiker und der wird‘s woll wissn. Egal, ob dem seine Anträge mit 39 zu 1 abglehnt werden. Die 39 sein doch alles Systempolitköpf. Zumindeschtens oa Aufrechta!

Na, weit hammas bracht, ha? Jetzt geh i zur Annasäule a Kerzl hinstellen. Für gegen die Impfdikdaduhr. Oder so. Sicher derf i des. Ausgangssperre? I sag einfach, dass i aufn Weg in a Schigebiet bin. Nix derfsch – außer Schifahrn. Ha! MFG, Koschuh